भांगरभूंय | प्रतिनिधी
सुदारीत येवजणेची अधिसुचोवणी जारी
भांगरभूंय । प्रतिनिधी
पणजी : अनुसूचीत जमाती खातीर (एसटी) नवें घर बांदपा सयत घर दुरुस्ती खातीर अर्थीक मजत दिवपी अटल आसरा येवजणेंत बदल करतना अर्थीक मजत तशेंच वर्सुकी येणावळीची मर्यादा वाडयल्या. तशेंच येवजणेच्या लावा खातीर बीडीओ कडल्यान पळोवणी करून अहवाल सादर करपाची अट लेगीत काडून उडयल्या. हे येवजणे खाला आतां नवें घर बांदपा खातीर 3 लाखा बदला 5 लाख रुपयांची अर्थीक मजत मेळटली. तशेंच घर दुरुस्त करपा खातीर देड लाखा बदला 3 लाख रुपया मेळटले.
ज्या एसटी लोकांची वर्सुकी येणावळ 3 लाखां मेरेन आसा, तांकांच हे येवजणेचो लाव मेळटालो. आतां हाचे फुडें वर्सुकी येणावळीची मर्यादा 3 लाखां वयल्यान 5 लाख रुपया मेरेन वाडयल्या. हाका लागून हे येवजणेचो लाव चड एसटी लोकांक घेवप शक्य जातलें. सुदारीत येवजणेची अधिसुचोवणी जारी जाल्या. तशेंच बांदकामाक सुरवात जाले उपरांत पळोवणी करून गटविकास अधिकाऱ्यांनी (बीडीओ) अहवाल दिवपाची अट काडून उडयल्या. बांदकाम परवाने आनी हेर कागदपत्रां सादर केल्या उपरांत आदिवासी कल्याण खात्याचे सर्वेयर पळोवणी करून अहवाल दितले. हाका लागून सोपस्कार पुराय करून अर्थीक मजत बेगीन दिवप शक्य जातलें. अर्थीक मजत दोन हप्त्यांनी जारी जातली. पयलो हप्तो 75 टक्के रकमेचो जाल्यार दुसरो हप्तो 25 टक्के रकमेचो आसतलो. येवजणेच्यो हेर अटी पयली भशेन आसात. पयल्या हप्त्याचो विनियोग 2 वर्सांनी केलोना जाल्यार ताची वसुली आदिवासी कल्याण खातें करतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
