भांगरभूंय | प्रतिनिधी
म्हापशेंः सांगोल्ड्यां चोगम रस्त्याचेर एका रेस्टॉरंटाच्या राखणे वण्टीक दुचाकीन धपको दिलो. ह्या आप-अपघातांत विकास रमेश सोलट (24, बारामती, पुणे) ह्या दुचाकी चलोवप्याक मरण आयलें. तो पर्वरीतल्या मॅजेस्टिक कॅसिनोंत कामाक आशिल्लो.
हो अपघात बिरेस्तारा फांतोडेर साडेचार वरांच्या सुमाराक जालो. विकास कामा वयल्यान सुटले उपरांत एमएच 42 बीएल 6921 ही मोटारसायकल घेवन सांगोल्डेंचे आपले रावपाचे कुडींत वतालो. वतना वाटेर चोगम रस्त्यार एका ओल्तारचेर ताचे मोटारसायकलीवेले नियंत्रण सुटले आनी उरफाटे दिकेन वचून कासा दी गेस्टर रेस्टॉरंटाच्या राखणे वण्टीक मोटारसायकलीन धपको दिलो.
ह्या अपघातांत विकासाचे हेल्मेट राखणे वणटीक आपटले आनी ते फुटले आनी ताचे तकलेक गंभीर जखम जाली. उपरांत ताका उपचारा खातीर म्हापशेंच्या जिल्हो हॉस्पिटलांत व्हेलो, पूण थंय दोतोरांनी ताका मरण आयिल्ल्याचें सांगलें.
अपघाताचो पंचनामो साळगांव पुलीस उपनिरीक्षक अक्षय गांवकार आनी हवालदार सुदेश नायक हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
