भांगरभूंय | प्रतिनिधी
पणजी: आप आदमी पक्षान 5 मार्चाक भाजपाच्या मुखेल कार्यालया मुखार आंदोलन केल्ले. हाचे आड पणजी पुलिसांनी आप कार्यकर्त्यांक समन्स धाडल्यात. भारतीय जनता युवा मोर्चान 21 फेब्रुवारीक काँग्रेसीच्या मुखेल कार्यालया मुखार अशेंच आंदोलन केल्ले. हे विशीं पुलिसांनी आयटी मंत्री रोहन खंवटे आनी भाजयुमोच्या आड एफआयआर नोंद करची अशी मागणी प्रदेशाध्यक्ष वाल्मीकी नायक हांणी केल्या. हे खातीर पक्ष कार्यकर्त्यांनी पणजी पुलीस स्टेशनां नुखार धरणे आंदोलन केले.
नायक हांणी सांगलें, अरविंद केजरीवाल हांचे आड दाखल केल्ली बोगस केस न्यायालयांत चल्ली ना. हाचे उपरांत आमी पणजेच्या भाजपाच्या मुखेल कार्यालया मुखार आंदलोन केल्ले. आमी हांगा पुतळोय लाशिल्लो. हे खातीर पणजी पुलिसांनी आमचे आड एफआयआर दाखल केल्ली. मुळांतूच आंदोलन करप हो लोकशायेंतलो आमचो हक्क. आमी कसलेच कायदे मोडूंक नाशिल्ले. तशेंच लाशिल्ल्या पुतळ्याचो कोयर आमी एका बॉक्सांत एकठांय करुन दवरिल्लो. आमी शांततायेन आंदोलन केल्ले.
तरी लेगीत आमचे आड एफआयआर नोंद जाली. दुसरे वटेन भाजपा युवा मोर्चान 21 फेब्रुवारीक केल्ल्या आंदोलनांत जायत्या कायद्यांचे उल्लंघन जाल्ले. आंदोलकांनी येरादारींत आडमेळीं हाडून पुलिसांचेर लेगीत हल्लो केल्लो. अशें आसून लेगीत ते सत्ताधारी पक्षाचे आशिल्ल्यान तांचेर कसलीच कारवाय जाली ना. लोकशायेंत सगळ्यांक समान न्याय मेळपाक जाय. हे खातीर भाजपाच्या युवा मोर्चाच्या कार्यकर्त्यां आड एफआयआर नोंद जावपाक जाय अशी मागणी नायक हांणी केली.
संदेश देसाय हांणी सांगलें, आंदोलन करप्यां आड एफआयआर दाखल करुन तांकां समन्स धाडपाचें काम सुरू आसा. भाजपाच्या ह्या चेपणाक आमी केन्नाच भियेवचे नात. आयज आमकां समन्स धाडून आपयल्यात. ही प्रक्रिया पुराय जायना तो मेरेन आमी पणजी पुलीस संघाच्या दारांत बसून धरणे आंदलोन करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
