भांगरभूंय | प्रतिनिधी
न्यायालयाचे परवानगे बगर कॅसिनो खातीर बोट मांडवींत हाडचे नात
डेल्टीन कंपनीची गोंयांतल्या मुंबय उच्च न्यायालयाक म्हायती
फुडली सुनावणी 6 जुलयाक
भांगरभूंय । प्रतिनिधी
पणजी : मांडवी न्हंयेच्या पात्रांत नव्यो आनी व्हड कॅसिनोच्या प्रवेशा वयल्यान आनी नियमना वयल्यान म्हत्वाची म्हायती मुखार आयल्या. डेल्टीन कंपनीन न्यायालयाक स्पश्ट केलां, न्यायालयाचे पूर्वपरवानगे बगर ते कॅसिनो खातीर नवी बोट मांडवी न्हंयेच्या पात्रांत हाडचे नात, अशी म्हायती कंपनी वतीन ज्येश्ठ वकील दारियस जे. खंबाटा हांणी न्यायालयांत दिली. मजगतीं, हे संबंदांतली फुडली सुनावणी 6 जुलयाक जातली.
फाटल्या कांय काळा सावन मांडवी न्हंयेंत कॅसिनोंच्या वाडट्या आंकड्याक लागून आनी पर्यावरणाच्या मुद्द्या वयल्यान थळावे तशेंच विवीध संघटणां वरवीं हुस्को उक्तायतात. हेच फाटभुंयेर इनाफ इज इनाफ हे संस्थेन दाखल केल्ल्या जनहीत याचिकेचेर उच्च न्यायालयांत सुचावणी चालू आसा.
ह्या प्रकरणांत बुधवारा न्यायालयांत सुनावणी जाली, तेन्ना मांडवी न्हंयेंत पोरणे कॅसिनो बोटी काडू ताचे सुवातेर 2 हजार प्रवाशी तांक आशिल्ले व्हड बोटीक बंदर कप्तानान नांगरपा खातीर परवानगी दिल्ली. ते खातीर सुरक्षा संबंदांतल्या कांय अटी सदळ केल्ल्यो. मजगतीं, सदळ केल्ल्या अटी संबंदांतलो आदेश फाटीं घेतला. तशेंच ती बोट सध्या मुरगांव बंदराचे हद्दींत नांगरून दवरल्या. जे मेरेन न्यायालयीन प्रक्रिया पुराय जायना आनी न्यायालयाची परवानगी मेळना, ते मेरेन ती बोट पणजेचे हद्दींत म्हणल्यार मांडवी न्हंयेच्या पात्रांत हाडचे नात, हाची हमी कंपनी वतीन ज्येश्ठ वकील दारियस जे. खंबाटा हांणी दिली.
मजगतीं, गृह खात्या वतीन न्यायालयांत प्रतिज्ञापत्र सादर केलें. तातूंत नवे कॅसिनो बोटी संबंदांत कसलोच अर्ज येवंक ना. तशेंच बोटीचे तांकी संबंदांत कॅसिनो परवान्यांत दुरुस्ती करपाची प्रक्रिया आशिल्ल्याची म्हायती न्यायालयांत दिली.
मजगतीं, याचिकादारा वतीन अॅड. आकाश रिबेलो हांणी हाका हरकत घेतली. मजगतीं, पोरणे बोटी वयल्यान नवे बोटीचेर परवानो (लायसन्स) हस्तांतरीत करपा संबंदांत कसलोय निर्णय घेतलो जाल्यार तो निर्णय घेवचे आदीं सगल्यांत पयलीं उच्च न्यायालयाचे नदरेक हाडून दितले.
मजगतीं, कंपनीन अजून मेरेन नवे कॅसिनो बोटीच्या परवान्या कातीर कसलोच अर्ज करूंक ना. मात, जर फुडारांत असो अर्ज केलो जाल्यार ताची म्हायती न्यायालयांत दितले. तशें न्यायालयाचे परवानगे बगर फुडली प्रक्रिया करतले, अशी म्हायती अॅडव्होकेट जनरल देविदास पांगम हांणी दिली. मजगतीं, न्यायालयान कंपनी कडेन सर्वेक्षणा कडेन संबंदीत प्रमाणपत्रा विशीं विचारलें तेन्ना सध्या तें प्रमाणपत्र उपलब्ध नाशिल्ल्याची म्हायती न्यायालयांत दिली. ह्या प्रकरणांत न्यायालयान सगल्यांची बाजू आयकून घेतले उपरांत फुडली सुनावणी 6 जुलयाक दवरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
