भांगरभूंय | प्रतिनिधी
समाज भावांच्या हिता खातीर प्रमाणपत्र दिवपाचो निर्णय
पणजी: भंडारी समाज म्हाल पांवड्या वेल्या समिती कडल्यान समाज प्रमाणपत्र दिवप सुरूच आसा. सगली म्हायती तपासून आमी प्रमाणपत्रां दितात. समाज भावांच्या हिता खातीर आनी प्रशासकाच्या सुचोवणे प्रमाण आमी प्रमाणपत्रां दितात, अशें भंडारी समाजाच्या म्हाल समितीच्या अध्यक्षांनी सांगलें.
भंडारी समितीच्या म्हाल समितीच्या अध्यक्षांनी पत्रकार परिशदेंत ही म्हायती दिली. दिवचल समितीचे अध्यक्ष सुशांत पेडणेंकार, सत्तरी समाज समितीचे अध्यक्ष भारत नायक, फोंडें समितीचे अध्यक्ष हेमंत नायक हांणी ही म्हायती दिली.
भंडारी समाजाचेर सध्या प्रशासकाची नेमणूक जाल्या. प्रशासक सगलो कारभार सांबाळटात. प्रशासकाचे सुचोवणे वेल्यान प्रमाणपत्रा खातीर नांवां पुरतें शुल्क आकारून आमी प्रमाणपत्र दितात. समाज भाव आमचे कडेन येतात म्हूण आमी प्रमाणपत्रां दितात, अशें सगल्यांनी सांगलें.
समाजाचें प्रमाणपत्र घेवन तलाठी चवकशी करतात आनी उपजिल्होधिकारी जातीचें प्रमाणपत्र दितात. समाज भावांचे सोये खातीर आमी प्रमाणपत्र दितात, असो दावो म्हाल समितीच्या अध्यक्षांनी केलो.
पयलींच्यो ज्यो म्हाल समित्यो आसात, तांकां समाजाचें प्रमाणपत्र दिवपाचे निदेश प्रशासक ह्या नात्यान हांवें दिल्यात अशें प्रशासक एस. व्ही. नायक हांणी सांगलें.
समाजाच्या प्रमाणपत्राची गरज ना, अशें न्यायालयाचे आदेश तशेंच सरकारान अधिसुचोवणी जारी केल्या. अशें आसून लेगीत समाजाचें प्रमाणपत्र दिवप ही गजाल बेकायदाे थारता. अधिकार नासतना प्रमाणपत्र दिवप हें बेकायदो थारता, अशें अॅड. आतीश मांद्रेंकार हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
