भांगरभूंय | प्रतिनिधी
म्हापशें: मिलाग्रीस सायबीण फेस्ताचे फेरयेंतल्यान म्हापशें पालिकेन 15.26 लाखांचो सोपो कर वसूल केला. हातूंत 13.95 लाख रुपया कर रक्कम जाल्यार 1.31 लाख रुपया दंडाच्या रकमेचो आस्पाव आसा.
सेंट जेरॉम चर्ची वतीन मनयतल्या वर्सुकी मिलाग्रीस फेस्ताचे फेरयेंत अदमाशेक 200 दुकानां आसतात. चर्च ते अलंकार थिएटर मजगतीं कपडे आनी खेळणी जाल्यार चर्च ते कोमुनिदाद घर इमारत मजगतीं फर्निचर आनी फातराच्या वस्तूंचे विक्रेते अशा स्टॉल्साचो आस्पाव आशिल्लो. दोनूय वटानच्या रस्त्याचे कुशीक फेरयेंतलीं दुकानां आसतात.
अंदूं 20 एप्रील दिसा हें फेस्त मनयले. जाल्यार पालिकेन फेरये खातीर 29 एप्रील म्हणल्यार 10 दिसांची मुजत दिल्ली. सोपो कराच्या स्वरुपांत पालिकेन स्टॉल्स आनी ल्हान विक्रेत्यां कडल्यान 13 लाख 95 हजार 50 रुपया रक्कम वसूल केली. जाल्यार दंडाच्या स्वरुपांत 1 लाख 31 हजार 200 रुपया रक्कम वसूल केली. फाटल्या वर्सा 15 दिसां परस चड दीस ही फेरी आशिल्ली. त्या वेळार 17.17 लाख रुपया सोपो कर महसूल मेळिल्लो.
फेस्ताचते फेरयेंतलो सोपो कर वसुली खातीर पालिका अधिकाऱ्यांनी पालिका निरिक्षक नरसिंह राटवळ, वरिश्ठ कारकून निलेश लिंगुडकार, कर्मचारी चिन्नाप्पा होळेप्पन्वर, प्रकाश कंबळे आनी आप्पालाल तासिवाले हांची नेमणूक केल्ली. ह्या पंगडान सगल्या दुकानांतल्यान वयलो सोपो शुल्क महसूल वसूल केलो.
फेरयेंत चर्च ते अलंकार थिएटर मजगतचे स्टॉल्स 30 एप्रील मेरेन काडूंक नाशिल्ल्यान तांचे कडल्यान दरेकी 500 ते 2 हजार रुपया प्रमाण 81 हजार 200 रुपया पालिकेन दंड वसूल केलो. पूण फर्निचर स्टॉल्सांचेर ही दंडात्मक कारवाय केली ना. कांय वेंचीक फर्निचर दुकानांतल्यो वस्तू जप्त केल्यो. उपरांत 50 हजार रुपया दंड आकारून ह्यो जप्त केल्ल्यो वस्तू तांकां परतून दिल्यो. ताका लागून फेरयेंतल्या स्टॉल्सा विशीं पालिका अधिकाऱ्यांनी राबयिल्ले हे भुमिकेचेर फेरिकारांनी निरशेणी उक्तायली.
मिलाग्रीस फेस्ताचे फेरयेंतल्यान सोपो कराच्या माध्यमांतल्यान पालिकेक सुमार 15.26 लाख रुपया महसूल मेळ्ळो. पालिकेच्या सोपो कर वसुली पंगडान बरी कामगिरी करून हो महसूल मेळयलो.
प्रकाश भिवशेट, प्रभारी नगराध्यक्ष.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
