जीटीडीसी वतीन गोंयकारां खातीर सुरू जातली अश्टविनायक, तिरूपती दर्शन यात्रा

भांगरभूंय | प्रतिनिधी

६ वर्सां उपरांत पर्यटकां खातीर हॉलीडे पॅकेजीस सुरू

पणजी : गोंय पर्यटन उदरगत म्हामंडळावतीन (जीटीडीसी) गोंयकारां खातीर आतां अश्टविनायक, तिरूपती, शिर्डी आनी वालंकिणी यात्रा सुरू करपाचो प्रस्ताव आसा. हाचे खातीर म्हामंडळ खासा दोन बशींची खरेदी करतलें, अशी म्हायती म्हामंडळाचे अध्यक्ष आमदार केदार नायक हांणी दिली. तशेंच कोविडाक लागून बंद जाल्ल्यो हॉलीडे पॅकेजीस आनी टूर आतां ६ वर्सां उपरांत परतून सुरू जाल्या. गोवा बियॉंड बीचीस ही संकल्पना कार्यवायेंत हाडपाचो हेत आसा, अशें अध्यक्ष केदार नायक हांणी सांगलें.
गोंय पर्यटन उदरगत म्हामंडळाचे (जीटीडीसी) अध्यक्ष केदार नायक हांणी बुधवारा पत्रकार परिशद घेतली. ह्या वेळार तांणी ही म्हायती दिली. म्हामंडळाचे वेवस्थापकी संचालक कुलदीप आरोलकार, उपसरवेवस्थापक दीपक नार्वेंकार, थाॅमस कुकचे प्रतिनिधी रूपेश पर्वतकार ह्या वेळार हाजीर आशिल्ले.
अश्टविनायक, शिर्डी, वालंकिणी यात्रा करपाची बर्‍याच गोंयकारांची इत्सा आसा. तांचे खातीर सवलतीच्या दरांत म्हामंडळा वतीन अश्टविनायक, शिर्डी, वालंकिणी, तिरूपती ह्या थळांचेर यात्रा सुरू जातल्यो. हाचे खातीर बशींची खरेदी करतले, अशें तांणी सांगलें.
पर्यटकांक गोंयचीं देवळां तशेंच भितरले सोबीतकायेचें दर्शन घडोवन हाडपा खातीर पर्यटक हॉलीडे पॅकेजीस परतून सुरू जाल्या. कोविडा वेळार ह्यो पॅकेजीस बंद जाल्ल्यो, त्यो आता परतून सुरू जाता. कॅपीटल रिट्रिट, कूल कोस्टलायन पॅकेज, सदन पॅकेज आनी या, या मयां या अश्यो ह्यो पॅकेजीस आसात.
कॅपीटल रीट्रिट पॅकेज (१८३३५ रूपया) ३ राती आनी ४ दिसांची आसतली. पणजी रेसीडेन्सीतल्यान सुरवात जाले उपरांत सिकेरी , फोर्ट आग्वाद, कळंगुट बीच तशेंच देवळां दाखोवपाची वेवस्था आसतली. कूल कोस्टलायन पॅकेज (१७५६० रूपया) ही कळंगुट रेसीडेन्सीतल्यान सुरवात जातली. ब्रेकफास्ट जेवणाची वेवस्था हातूंत आसतली. बॅसीलीका, मंगेशी, शांतादुर्गा देवळा सयत रिवर क्रुजचो हातूंत आसपाव आसतलो. सदन गेटवे पॅकेजीची १४४५१ रूपया) सुरवात मडगांव आनी वास्को रेसीडेन्सींतल्यान जातली. या, या मया या (७१२४ रूपया) पॅकेजीची सुरवात मयें रेसीडेन्सींतल्यान जातली. हरवळें घसघसो, विठ्ठल मंदीर, कुडणे जैन मंदीर, पांडव गुहा हांचो आस्पाव हातूंत आसतलो. हे भायर एका दिसाच्या मयें टुराचो लेगीत पॅकेजीन आसपाव आसा.