भांगरभूंय | प्रतिनिधी
डीएमके कडली धा वर्सांची युती तोडली
चेन्नय : तमिळनाडूच्या राजकारणांत एक व्हड बदल घडून आयला. भारतीय राष्ट्रीय कॉंग्रेसीन ’द्रविड मुन्नेत्र कळहम’ (डीएमके) वांगडा आशिल्ली आपली धा वर्सांची युती तोडून अभिनेतो विजय हाच्या ’तमिळगा वेत्री कळहम’ (टीव्हीके) पक्षाक तेंको दिवपाचो निर्णय घेतला. राज्यांत सरकार स्थापन करपाच्या प्रयत्नांक हाका लागून बळगें मेळ्ळां.
अटींचेर तेंको
’टीव्हीके’ हो सगळ्यांत व्हड पक्ष म्हणून मुखार आयला, पूण सरकार स्थापन करपाक तांकां संख्याबळाची (आठ जाण जाय) गरज आसा. ’टीव्हीके’चे अध्यक्ष विजय हांणी कॉंग्रेसी कडेन पालव मागलो, जाका कॉंग्रेसीन मान्यताय दिल्या. कॉंग्रेसीच्या म्हणण्या प्रमाण, तमिळनाडूंतल्या लोकांनी, खास करून युवकांनी, संविधानाचेर विश्वास दवरपी आनी निधर्मी सरकाराच्या वतीन कौल दिला.
युती फकत सरकारा पुरती मर्यादीत ना
कॉंग्रेसीन जाहीर केलां की, ही युती फकत सरकार स्थापन करपा पुरतीच उरची नासून ती दीर्घकालीन आसतली. फुडाराक जावपी थळाव्यो वेंचणुको, लोकसभा आनी राज्यसभा वेंचणुकां खातीरय दोन्ही पक्ष एकठांय काम करतले. परस्परांचो आदर आनी जबाबदारीच्या वांटपाचेर ही युती आदारलेली आसतली.
जातीयवादी शक्तींक प्रवेश ना: कॉंग्रेसची मुखेल अट
कॉंग्रेसीन एक अट दवरल्या ती म्हणल्यारभारतीय संविधानाचेर विश्वास नाशिल्ल्या खंयच्याय ’जातीयवादी शक्तींक’ हे युतींत आस्पावन घेवंक फावना. जर विजय अशा शक्तींक पयस दवरता, तरच कॉंग्रेसीचो तेंको कायम उरतलो.
कॉंग्रेसीच्या ह्या निर्णयाक लागून तमिळनाडूच्या राजकीय मळार नव्या समीकरणांक सुरवात जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
