भांगरभूंय | प्रतिनिधी
पणजी: मांडवी न्हंयेंत, खास करून जंय ऑफशोर कॅसिनो उबे आसात, थंय ’फिकल कोलिफॉर्म’चें (विश्ठेंतले जीवाणू) प्रमाण भिरांकूळ रितीन वाडलां. ह्या गंभीर विशयाचेर गोंयांतल्या मुंबई उच्च न्यायालयान हुस्को उक्तायला. न्यायालयान गोंय राज्य प्रदूशण नियंत्रण मंडळाक न्हंयेच्या उदकाच्या दर्ज्याची नवी तपासणी करून ताचो अहवाल १ जून मेरेन सादर करपाचो आदेश दिला.
कॅसिनो आनी पर्यटन बोटींची तपासणी
हो नवो अभ्यास खास करून न्हंयत नांगरून दवरिल्ले कॅसिनो आनी पर्यटना खातीर वापरपांत येपी बोटीं भोंवतणच्या उदकाचे नमुने एकठांय करून तांचें विश्लेशण करपाचेर लक्ष केंद्रीत करतलो.
जीएसपीसीबीच्या हालींच्या अहवालांतल्यान एक धक्कादायक गजाल मुखार आयल्या. कॅसिनो वाठारांतलें प्रदूशण थारायिल्ले मर्यादे परस २००% चड आसा. २०२२ सावन हें प्रमाण सातत्यान धोक्याची मर्यादा ओलांडत आसा. हें प्रदूशण चड करून प्रक्रिया न केल्लें घाणयारें उदक न्हंयेंत सोडिल्ल्यान जालां, जाका लागून हें उदक विरंगुळ्याच्या कामां खातीर (देखून पेंवपाक) सुरक्षीत उरूंक ना.
नेम कितें सांगतात?
नेमां प्रमाण, फिकल कोलिफॉर्मची मर्यादा दर १०० मिली उदकांत १०० एमपीएन वा ताचे परस उणें आसूंक जाय. एमपीएन म्हणजे मोस्ट प्रोबेबल नंबर ही उदकांतल्या ’ई-कोलाय’ सारक्या सुक्ष्म जिवाणूंची संख्या मेजपाची एक पद्धत आसा.
सध्या मांडवींतलें हें प्रमाण पळोवन न्हंयेच्या पर्यावरणाचेर व्हड संकट आयल्याचें स्पश्ट जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
