भांगरभूंय | प्रतिनिधी
भारताच्या एच एस प्रणॉयान आपल्याच देशाच्या लक्ष्य सेनाक हारोवन संवसारीक बॅडमिंटन वस्तादपण सर्तीचे क्वॉर्टरफायनलींत सुवात मेळयली. बर्मिंहॅम राष्ट्रकूलांत दादल्यांच्या एकोड्या गटांत भांगरा पदक जिखपी लक्ष्य सेनान जबरदस्त प्रदर्शन केलें. पूण, अणभवी प्रणॉया मुखार ताचें शाणपण चलूंक ना. प्रणॉयान अणभवाच्या नेटार लक्ष्य सेनाक 17-21, 21-16 आनी 21-17 अशा तीन गेमींनी हारयलो.
19 वर्सां पिरायेच्या लक्ष्य सेन संवसारीक बॅडमिंटन वस्तादपण सर्तींत भांगरा पदक जिखतलो अशें भारताच्या बॅडमिंटन मोग्यांक आस्त आशिल्ली. पूण, तो हारिल्ल्यान भांगरा पदक हाडपाची जापसालदारकी प्रणयाचेर आयली.
मजगतीं, बायलांच्या एकोड्या गटांत सायना नेहवाल प्री क्वॉर्टरफायनलींत हारली. उत्कृश्ठ खेळ करून लेगीत तिका थायलॅण्डाचे बुसानन ओंगबाम्रुंगफान हिच्या कडल्यान 17-21, 21-16 आनी 13-21 अशा तीन गेमींनी हार घेवची पडली.
ह्या जैता सयत बुसाननाचो सायना आडचो जैताचो रॅकॉर्ड 5-3 असो जालो. बुसाननान पयले गेमींत 11-3 अशी आघाडी घेतिल्ली. ताका लागून सायनाचेर चेपण आयलें. तरी आसतना सायनान अंतर उणें करतना स्कोर 17-19 असो केलो. पूण, थायलॅण्डाचे खेळगडयेन सहज रितीन पयली गेम जिखली. पयले गेमीचे अखेरेक मॅचींत येवपाचो यत्न केल्ल्यान सायनाचो आत्मविस्वास वाडलो. हाचो फायदो तिका दुसरे गेमींत जालो. ब्रेका मेरेन सायनान 1-7 अशी आघाडी घेतली. तिणें आपली ही आघाडी कायम राखून मॅचींत 1-1 अशी बरोबरी केली आनी मॅच निर्णायक गेमींत पावली.
तिसरे गेमींत दोगांयनी एकामेकाक खर आव्हान दिलें. पूण, बुसाननान लय मेळोवप सुरवात केली आनी पांच गुणांची आघाडी घेतली. दुसरे वटेन सायना ल्हवल्हव फाटीं पडत गेली. अखेरेक बुसाननान सात मॅच पॉयण्टा वरवीं क्वॉर्टरफायनलींतली आपली सुवात निश्चीत केली.
कपिला-अर्जुन जोडी निमाण्या आठांनी
भारताचे ध्रुव कपिला आनी एम आर अर्जुन हे जोडयेन जबरदस्त प्रदर्शन करून क्वॉर्टरफायनलींत सुवात मेळयली. तांणी टॅरी ही लोह कीन हीन हे जोडयेक 58 मिनटां मेरेन चलिल्ले मॅचींत 18-21, 21-15 आनी 21-16 अशा तीन गेमींनी हारयली.
कपिला-अर्जुन ही जोडी आतां इंडोनेशियाचे मोहम्मद असान आनी हॅण्ड्रा सेतियावान हे जोडये आड खेळटली.
सात्विक-चिराग जोडी क्वॉर्टरींत
सात्विकसाईराज रंकीरेड्डी आनी चिराग शेट्टी हे जोडयेन फुडले फेरयेंत सुवात मेळयली. सात्विक आनी चिराग हांणी डॅनमार्काचे जेप्पा बे आनी लासे मोल्हेडे हे जोडयेक 35 मिनटां भितर 21-12 आनी 21-10 अशा सरळ गेमींनी हारयली. भारताची जोडी आतां क्वॉर्टरफायनलींत जपानाचे ताकुरो होकी आनी युगो कोबायाशी हे जोडये आड खेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
