भांगरभूंय | प्रतिनिधी
पणजीः न्या. फेर्दीन रिबेलो हांची ‘आनीक सोंसू नेजो’ चळवळ बार्देश म्हालांत गती घेतले. बार्देश म्हालांतली पयली बसका १० मेक कांदोळे जातली. हे जनसभेक बार्देस तशेंच गोंयभरच्या लोकांनी हजेरी लावची, असो उलो संघटनेचे उत्तर गोंय प्रभारी प्रेमानंद दिवकार हांणी मारला.
संघटनेचे पणजे कचेरेंत आपयिल्ले पत्रकार परिशदेंत ते उलयताले. तेन्ना चळवळीचे वांगडी फ्रान्सिस कोएल्हो आनी देविदास आमोणकार हजर आशिल्ले.
न्या. रिबेलो हांचे ‘आनिक सोसूं नेजो’ चळवळीक बरो प्रतिसाद मेळ्ळा. हाचोच एक भाग म्हूण बार्देस म्हाला खातीर कळंगुट मतदारसंघाच्या सिकेरी गांवांत १० मेक सांजे ५ वरांचेर बसका आपयतले. ही बसका साल नोस्सा दे सिन्होरा कॉपेलाच्या सालांत जातली. हे बसके खातीर आमी सगळी तयारी केल्या. ही फकत एक घडोवन हाडिल्ली बसका न्हय तर ही एक जनसभा जावन आसतली. देखून व्हडा संख्येनी लोकांनी हे बसकेक हजर रावचें, असो उलो दिवकार हांणी मारला.
ही बसका बार्देस म्हालातल्या लोकां वांगडाच, पुराय गोंयच्या लोकां खातीर उक्ती आसा. बार्देस म्हालातले वरिश्ठ फुडारी हे बसकेक वक्ते म्हण हजर आसतले. न्या. फेर्दीन रिबेलो हे सभेचे बीज भाशण करतले. ही चळवळ अशीच फुडे वचून गोंय राज्यात एक सकारात्मक बदल हाडटली, असो विश्वास दिवकार हांणी उक्तायलो.
आनिक सोसूं नेजोच्या उत्तर गोंय पंगडाची बसका जावन तांणी येता त्या काळांत बार्देश आनी सत्तरी उपरांत तिसवाडी म्हालात बसका घेवपाचे थारयलां. उपरांत रिबेलो हे एनजीओ आनी कलाकार समुदायाच्यो भेटी घेतले. अशे रितीन ही चळवळ फुडें वतली, अशी म्हायती फ्रान्सिस कुएल्हो हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
