भांगरभूंय | प्रतिनिधी
वास्को : मुरगांव म्हालांतल्या सांकवाळ पंचायतींतल्या सरपंच आनी उपसरपंच पदां खातीर आशिल्ली प्रलंबीत वेंचणुकेची तारीख निमाणी निश्चीत जाली. पंचायत संचालनालयान १२ मेक वेंचणूक घेवपाचे अधिकृत आदेश जारी केल्यात. विशेश म्हळ्यार, हो निर्णय उच्च न्यायालयांतले सुनावणेच्या एका दिसा पयलीं जाहीर केले.
४ मेक काडिल्ल्या आदेशा प्रमाण, सांकवाळ सरपंच आनी उपसरपंच पदा खातीर १२ मेक विशेश बसका घेवन वेंचणूक प्रक्रिया जातली. हे बसकेच्या अध्यक्ष निकोलस क्वाद्रोस सांबाळपाचे आशिल्ल्यान ते हाजीर नासतना तशी पर्यायी वेस्थाय केल्या.
ह्या घडामोडींची फाटभूंय म्हळ्यार म्हायती अधिकार कार्यकर्ते नारायण नायक हांणी दाखल केल्ली याचिका. पंचायतींतल्या ह्या म्हत्वाच्या पदांचे वेंचणुकेंत जावपी कळावाक आव्हान दिवन तांणी उच्च न्यायालयांत धांव घेतिल्ली आनी वेंचणूक प्रक्रिया बेगोबेग पुराय करपाचे निर्देश दिवपाची मागणी केल्ली.
पंचायत संचालनालयान निमाणें वेंचणुकेची तारीख जाहीर केले उपरांत, बर्याच काळा सावन आशिल्लें रितेंपण भरपाचीं चिन्ना दिसतात. मात, न्यायालयीन सुनावणे पयलींच आदेश जाहीर जाल्ल्यान ह्या निर्णयाचे वेळे विशीं चर्चा रंगपाक लागल्यात. आता १२ मेक जावपी वेंचणुके कडेन सगल्यांचें लक्ष लागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
