भांगरभूंय | प्रतिनिधी
पणजी: पेडणें म्हालांतल्या विज्ञान विशयांत नापास करपाची आनी फोटू सोशल मिडियार घालपाची धमकी दिवन सान पिरायेच्या विद्यार्थिनीचेर लैंगीक अत्याचार केलो. ह्या प्रकरणांत पणजेच्या पॉक्सो न्यायालयान 54 वर्सां पिरायेच्या विज्ञान शिक्षकाक 11 वर्सांची खर बंदखण आनी 85 हजार रपया दंडाची ख्यास्त दिली. हे विशींचो आदेश न्या. पुजा कवळेंकार हांणी दिलो.
ह्या प्रकरणांत पेडणें पुलिसांनी 15 जून 2020 दिसा गुन्यांव दाखल केल्लो. ते प्रमाण 2015 ते 2019 ह्या काळांत आरोपीन आपलेच शाळेंतल्या सान पिरायेच्या विद्यार्थिनीचेर विज्ञान विशयांत नापास करपाची धमकी दिली. तशेंच तिचेर सेगीत लैंगीक अत्याचार केले. पिडीत चली त्या वेळार फक्त 16 वर्सांचें आशिल्लें. हे घडणुकेची खबर कोणाकूय सांगल्यार तिचे फोटे सोशल मिडियाचेर व्हायरल करपाची धमकी दिल्ल्याची म्हायती कागाळींत नमूद केली.
ह्या कागाळीची दखल घेवन तेन्नाचे पुलीस निरिक्षक संदेश चोडणकार हांच्या मार्गदर्शना खाला उपनिरिक्षक प्रफुल्ल गिरी हांणी दुबावीत शिक्षका आड गुन्यांव दाखल करून 15 जून 2020 ह्या दिसा अटक केली. ताचे उपरांत तपास पुराय करून 7 ऑगस्ट 2020 दिसा न्यायालयांत आरोपपत्र दाखल केलें.
ह्याच वेळार दुबावितान पॉक्सो न्यायालयांत जामीन अर्ज दाखल केलो. तो न्यायालयान भायरायलो. उपरांत दुबावितान मुंबय उच्च न्यायालयाच्या गोंय खंडपिठांत जामीन अर्ज दाखल केलो. त्या वेळार उच्च न्यायालयान 15 एप्रील 2021 दिसा सशर्त जामीन मंजूर केलो. उपरांत पॉक्सो न्यायालयान प्रथमदर्शनी पुराव्याची दखल घेवन आरोप निश्चीत करून खटलो सुरू केलो.
ह्या प्रकरणांत न्यायालयांत सुनावणी जाली तेन्ना, सरकारी अभियोक्ता अर्चना भोबे आनी शिल्पा नागवेंकार हांणी युक्तीवाद करून पुरावे सिद्ध केले. ह्या प्रकरणांत पिडीत विद्यार्थिनी आनी शाळेंतल्या हेर शिक्षकांनी दिल्ली साक्ष म्हत्वाची थारली. हाची दखल घेवन न्यायालयान आरोपीक दोशी थारायलें. उपरांत आरोपीक विद्यार्थिनीचेर लैंगीक अत्याचार केल्ल्या प्रकरणांत 11 वर्सा खर बंदखण आनी 85 हजार रुपया दंडाची ख्यास्त दिली.
मजगतीं, न्यायालयान आरोपीक भारतीय दंड संहितेच्या कलम 376 खाला 11 वर्सा खर बंदखण आनी 50 हजार रुपया दंड. (दंड भरलो ना जाल्यार एका म्हयन्याची सादी बंदखण) सुनायल्या. तशेंच पॉक्सो कायद्याच्या कलम 4 खाला 11 वर्सा खर बंदखण आनी 25 हजार रुपया दंड, कलम 8 खाला 3 वर्सा खर बंदखण आनी 10 हजार रुपयांचो दंड आनी हेर ख्यास्त दिल्या. ह्यो सगल्यो ख्यास्ती आरोपीन एकाच वेळार भोगपाच्यो आसात अशें न्यायालयाच्या आदेशांत स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
