भांगरभूंय | प्रतिनिधी
काणकोण: भारतीय स्टेट बँकेच्या काणकोण फांट्यान आपल्या सी.एस.आर. निधींतल्यान गांवडोंगरी हांगासरल्या सरकारी माध्यमीक विद्यालयांतल्या 70 चलयांक सुमार 4.50 लाख रुपया मोलाच्यो 70 साकयकली तशेंच सुमार 3 लाख रुपया खर्च करून बांदिल्लें प्रसाधनगृह सोमारा सुपूर्द केलें. गांवडोंगरी हांगासरल्या विद्यालयांत जाल्ल्या ह्या भेटवण सुवाळ्याक उपम्हावेवस्थापक शैलेंद्र मिश्रा, दक्षीण गोंयचे विभागीय वेवस्थापक आशीश कुमार, काणकोण फांट्याचे वेवस्थापक आशीश पवार, गांवडोगरी फांट्याचे वेवस्थापक धीरज कुमार सिंग, विद्यालयाचे मुख्याद्यापक सागर वेळीप आनी पालक शिक्षक संघाचे अध्यक्ष उल्हास गांवकार हाजीर आशिल्ले.
ह्या वेळार उलयतना मिश्रा हांणी सांगलें, गांवडोंगरेच्या गांवगिऱ्या वाठारांतलीं भुरगीं लेगीत तितलींच हुशार आसून ह्या विद्यालयाचो निकाल शंबर टक्के लागता. तशेंच ह्या वाठारांतल्या चलयां मदीं धिटाय वाडची हे खातीर तांकां सायकली भेटयल्यो. तशेंच सुसज्ज अशें प्रसाधनगृह लेगीत दिलां. भारतीय स्टेट बँक सी. एस. आर. निधींतल्यान समाज उपेगी कामां करीत आसता अशें तांणी म्हणलें.
ह्या वेळार शिक्षक यशवंत वेळीप हांणी विद्यालयांत ज्या गरजेच्या सामानाची गरज आशिल्ली ती दात्यां कडल्यान मेळत आशिल्ल्यान विद्यालयांतल्या विद्यार्थ्यांकूय मेकळ्या वातावरणांत शिकूंक मेळटा आनी ताका लागून विद्यालयाचो निकाल लेगीत 100 टक्के लागता अशें सांगलें.
सुरवेक विद्यार्थ्यांनी मानेस्तांक फुलांच्या झाडांची कुंडी भेटयल्यो. येवकार आनी प्रास्तावीक आशीश पवार हांणी केलें. सुत्रसंचालन निधी पैंगीणकार हांणी केलें. जाल्यार निमा कार्वालो हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
