भांगरभूंय | प्रतिनिधी
अस्तंत बंगालांत फाटल्या 15 वर्सां सावन सत्तेर आशिल्ली आनी भाजपाच्या जैताचे वाटेर उबी आशिल्ली ममता बॅनर्जी ही खमकी बायल फुडारी विधानसभा वेंचणुकेंत अपेशी थारली. भाजपाक अस्तंत बंगालांत पयलेच खेप जैत मेळ्ळां. तेंय बी राजकी जाणकारांनी अपेक्षा करूंक नाशिल्लें इतलें. ‘खेला होबे, जेतबो आमरा’ ही तृणमुलाची घोशणा. म्हणल्यार खेळ जातलो आनी जैत आमचेंच जातलें. भाजपान ते घोशणेक ‘विकास होबे’ म्हणल्यार उदरगत जातली, अशी प्रतिघोशणा दिल्ली. जैत मेळ्ळां, आतां उदरगतीक पेंगट मारचें पडटलें. मंत्रीमंडळाचे पयलेच बसकेंत विकासाचे व्हडले निर्णय जातले, अशें प्रधानमंत्री नरेंद्र मोदी हांणी जाहीर केलां. केरळांत काँग्रेस आघाडी जिखली, तर आसामांत भाजपाची एनडीए आघाडी. पुदुच्चेरींतय भाजपाचीच एनडीए सत्तेर येतली. तामिळनाडूंत द्रमूक आनी अण्णाद्रमूकां मदीं खेला चलता. मात हे खेपे नवख्या विजयान जैत मेळयलें. बऱ्याच वर्सांचे मेहनती उपरांत भाजपान बंगालांतलो टीएमसीचो गड जिखला. मात दक्षीणी राज्यांनी ताका नदरेंत भर सारकें येश मेळूंक ना.
तृणमूल काँग्रेस पक्ष कित्याक हारलो, ताचेर जाणकारांचे वेगळे वेगळे अदमास. बंगालाक बांगलादेशाची शीम तेंकल्या, म्हणटकच घुसखोरी ही जाताच. ताचेर नियंत्रण दवरपाक दोनूय सरकारांक अपेस आयलां. हो संवेदनशील मुद्दो. घुसखोरी बंद जातली, अशें काल सांगलां. पळोवया. दाव्यांच्या काळांत आंदोलन जालें काय दोन तरी बसी पेटोवपाची परंपरा आशिल्ली. अजूनय ती आसा. फाटल्या कांय वर्सांनी दोन राजकी विचारसरणेच्या वावुरप्यां मदीं पेट्टालें. मरताले ते आनी भलतेच. आमी सुडाचें न्हय, तर विकासाचें राजकारण करतले, अशें प्रधानमंत्र्यांनी काल जैताचे सभेंत सांगलां. भश्टाचार हेंवूय एक कारण. शारदा फंड हें एक उदाहरण. चड म्हत्वाचें, प्रस्थापितां आड आशिल्ली हवा. बऱ्या, वायट मार्गान ती भायर सोडली ना जाल्यार सत्ते वयल्या पक्षाचो टायर फुट्टाच! बंगालांत तशेंच जालां आसुये. मात हे फाटभुंयेर भाजपा आनी तांच्या इश्ट पक्ष, संघटणांच्या वावुरप्यांचें कार्य नदरे आड करूंक जावचें ना. घर, दार सोडून बरेच तरणाटे पक्ष, पक्षाचे विचारसरणे खातीर वावुरतात. थंय रावन संघटन बळिश्ट करतात. हे निश्ठेचें ह्या जैतांत योगदान आसा, हें मान्य करचेंच पडटलें.
अस्तंत बंगालांत 93 टक्के विक्रमी मतदान जालां. उरिल्ले चार कडेनूय तो जाला. हातूंत बायलांचो वांटो चड. हाचे मुखार बायलो आनी 40 वर्सां सकयले तरणाटे देशाच्या राजकारणाक वेगळी दिशा दिवपाची शक्यताय आसा. कारण मतदारां मदीं तांचो वाटो 50 टक्क्यां वयर पावला. बंगालांत बायलांक सुरक्षीत वातावरण मेळटलें. तरणाट्यांक रोजगार मेळटलो, स्थलांतर बंद जातलें, अशें आस्वासन मोदी हांणी दिलां. बंगालूच न्हय, तर उत्तर प्रदेश, बिहार, झारखंड, ओडिशा, आसामाचे बाबतींतूय हें जाल्यार त्या- त्या राज्यां, म्हानगरांतल्या बेरोजगारांक थाकाय मेळटली. गोंयांतूय ते येतात. मागीर थळावे आनी तांचे मदीं संघर्श जाता. राज्यांची, म्हानगरांची वळख, संस्कृताय, मानसिकताय बदलून उडोवपी हें स्थलांतर 2047 मेरेन तरी बंद जावचें. गांवांतूच रोजगाराची बरी संद निर्माण जाल्यार कोण गांव सोडटा?
देशांतली कम्युनिस्ट विचारसरणी उणी जायत आसा, हें ह्या निकालान दिसलें. आतां दाव्यांचें स्वताचें अशें एकूय सरकार ना. समाजांतलीं तत्वां, धोरणां, आचार, विचार, सभाव, प्राधान्यक्रम बदल्ल्यात. ‘आपलो आनी कुटुंबाचो सुवार्थ’ हाचेर दरेकलो भर दिवपाक लागला. ताचो राजकी निकालाचेर परिणाम जातलोच.
जैता खातीर सगल्या पक्षांक परबीं. तांणी सगल्यांक वांगडा घेवन देशाक वयर काडपाचो यत्न करचो. जे हारले तांणी पक्ष आनी फुडाऱ्यांक पांच वर्सां सांबाळून फुडली वेंचणूक जिखपाचो यत्न करचो. जय हिंद.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
