भांगरभूंय | प्रतिनिधी
मोदी : गंगोत्री पसून गंगासागरा मेरेन कमळ फुल्लें
खबरां संस्था
नवी दिल्ली : पांचांतल्या तीन राज्यांनी (अस्तंत बंगाल, आसाम आनी पुद्दुचेरी) भाजप सरकार स्थापन करता. दिल्लींतल्या भाजप मुख्यलयांत जाल्ल्या सुवाळ्यांत उलयतना प्रधानमंत्री नरेंद्र मोदी हांणी सांगलें, आयचो दीस इतिहासीक आनी अद्भूतपूर्व आसा. देशभरांतल्या कार्यकर्त्यांच्या चेऱ्याचेर आपल्याक खोशी दिसता. खूब वर्सांचें निश्ठेचें फळ मेळ्ळे उपरांतची खोशी. तांकां मेहनतीचें फळ मेळ्ळें.
पोरूं, 14 नोव्हेंबराक आपणें हांगाच्यानूच म्हणिल्लें, गंगा बिहारांतल्यान व्हांवत वचून गंगासागराक मेळटा. आयज, बंगालच्या जैतान गंगोत्री पसून गंगासागरा मेरेन कमळ फुल्लां. उत्तराखंड, उत्तर प्रदेश, बिहार आनी आतां आतां अस्तंत बंगाल. आयज गंगा न्हंयेदेगे वयल्या राज्यांनी भाजप आनी एनडीएचीं सरकारां सत्तेंत आसात, अशें प्रधानमंत्री मोदी हांणी सांगलें.
एक कार्यकर्ता म्हणू, आपूण दरेका भाजपा कार्यकर्त्यांचे खोशयेंत वांटेकार आसा. हो दीस खूब अर्थांनी खास आसा. ही देशाच्या पर्जळीत फुडाराची घोशणा आसा, विस्वासाचो दीस आसा. भारताच्या म्हान लोकशायेचेर विस्वास, कामगिरीच्या राजकारणाचेर विस्वास, एक भारत श्रेश्ठ भारताचे भावनाचेर विस्वास, अशें प्रधानमंत्र्यान सांगलें.
डॉ. श्यामा प्रसाद मुखर्जीच्या आत्म्याक शांती मेळ्ळी आसतली. तांणी 1951 त जनसंघाची स्थापना केली आनी दरेका कार्यकर्त्याक देशा खातीर जगात आनी देशा खातीर मरात, हो संदेश दिलो. बंगालाक भारताचो भाग म्हूण कायम दवरचे खातीर, डॉ, मुखर्जी हांणी एक व्हड लडाय लडली, अशेंय मोदी हांणी सांगलें. सभे खातीर ते खास बंगाली पारंपरीक मुस्तायकी घालून आयिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
