भांगरभूंय | प्रतिनिधी
म्हजे चडशे इश्ट हिंदू आसात; तपासाक सहकार्य करतलों
सोमारा परतून दुसरे खेपे चवकशी
पणजी : सनातन धर्माक हांव काळजा सावन मानतां. म्हजे चडशे इश्ट हिंदू आसात. गोंयांत हिंदू, किरीस्तांव अशे सगल्या धर्माचे लोक एकठांय रावतात. हांव सनातन धर्माआड ना. गौतम खट्टराक गोंयांत येवपाचेर बंदी घालपाक जाय, इतलेंच हांवें म्हणलां, अशें वॉरेन आलेमाव हांणी स्पश्ट केलां.
व्हायरल व्हिडीयोक लागून वॉरेन हाचे आड पणजी पुलिशेंत गुन्यांव नोंद जाला. आयतारा उपरांत आयज सोमारा लेगीत तांची पुलिसांनी चवकशी केली. उपरांत पत्रकारां कडेन उलयतना तांणी आपल्या व्हिडीयोचो अनर्थ केल्ल्याचें सांगलें.
हांव कायदो मानपी आनी गोंयचें हीत जपपी नागरीक आसा. जेन्ना, जेन्ना पुलीस म्हाका आपयतात, तेन्ना, तेन्ना पुलिशेंत हाजेरी लावन हांव तपासाक सहकार्य करतलों, अशें ताणें सांगलें.
गोंयांत हिंदू, क्रिस्तांव तशेंच सगल्या धर्मां मदीं पयलीं सावन घट एकचार आसा. वास्को जे संघटणेन कार्यावळ आयोजीत करून गौतम खट्टराक निमंत्रण दिल्ले ते संघटणेची चवकशी जावपाक जाय, अशी मागणी तांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
