भांगरभूंय | प्रतिनिधी
पणजीः भाजपान पश्चीम बंगाल विधानसभा वेचणुकेंत टीएमसीचेर जैत जोडलें. ह्या येसा फाटल्यान गोंयचे पुत आनी भाजपाचे संघटन मंत्री सतीश धोंड हे पड्ड्या फाटले सुत्रधार आसात. तांणी बंगालांत संघटन मंत्र्याचो ताबो घेतले उपरांत भाजपाक बंगालांत पयलेच खेपे येस फावो जालां. ह्या येसा खातीर गोंयच्या कार्यकर्त्यांनी तांकां परबीं भेटयल्यांत.
सतीश धोंड हे भाजपाचे एक ज्येश्ठ फुडारी आनी राष्ट्रीय स्वयंसेवक संघाचे (आरएसएस) आदले प्रचारक आसात. जुलय २०२२ वर्सा तांची अस्तंत बंगालांत संघटन मंत्री म्हण नेमणूक जाल्ली. गोंयांतल्या तांच्या येसस्वी वावरा उपरांत, बंगालांतली पक्षाची संघटनात्मक मांडावळ घट करपा खातीर आनी संघटन महामंत्री अमिताभ चक्रवर्ती हांकां आदार दिवपा खातीर तांची बदली बंगालांत जाल्ली.
२१ जुलय २०२२ दिसा भाजपचे राष्ट्रीय अध्यक्ष जे. पी. नड्डा हांणी धोंड हांची नेमणूक केली. खास करून पंचायत आनी २०२४ च्या लोकसभा वेचणुकां खातीर बंगालांतली भाजप संघटना घट करप, हो तांच्या नेमणुके फाटलो मुखेल उद्देश आशिल्लो. मुळाव्या पांवड्यार संघटनात्मक वावर करून बंगालांत भाजपची शक्त वाडोवपाची जापसालदारी तांचेर सोपयल्ली.
ह्या संघटनात्मक वावरवाचे फळ भाजपाक निमणें फावो जालें. धोंड हांची बंगालांत नियुक्ती जाले उपरांत पयलेच खेपे भाजपान फक्त बंगालाचो गड भेदूंक ना. जाल्यार १५ वर्सां सत्तेंत आशिल्ले टीएमसीक घरा धाडून भोवमताचो आंकडो हुपला. प्रसिध्दी पसून सामको पयस रावन धोंड हांणी शांतीकायेन पक्षाची एकहाती बांधणी केल्या.
धोंड हांचे हे कामगीरीक लागून भाजप कार्यकर्त्या मदीं तांची चर्चा परत एकदां सुरू जाल्या. रणीनीतीचे शिल्पकार आनी जैताचे शिलेदार अशी तोखणाय भाजप कार्यकर्त्यांनी केल्या. अस्तंत बंगालांत संघटन मंत्री म्हण कर्तव्यनिश्ठेन कार्यरत रावन आपलो वेळ, परिश्रम आनी समर्पण अर्पण करून भाजपाक येसाचे तेंगशेर व्हरपी. रणनीती, नियोजन आनी अचूक संघटनाक लागून बंगालांत भाजपाक व्हड जैत दिवपी, कॅमेरा पसून पयस… प्रसिद्धी पसून सदांच पयस, श्रेय घेनासतना फकत प्रामाणिकपणान काम करपी, अश्या उतरांनी भाजपाच्या कार्यकर्त्यांनी सोशल मिडायाचेर धोंड हांची तोखणाय केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
