भांगरभूंय | प्रतिनिधी
मुख्यमंत्री डॉ. प्रमोद सावंत हांणी केली कामाची पळोवणी
दिवचल: मुख्यमंत्री डॉ. प्रमोद सावंत हांणी सोमारा अस्नोडा बायपास रस्त्याच्या कामाची पळोवणी ताचे उदरगतीचो नियाळ केलो. सुमार १६५ कोटी रुपया खर्च करून बांदपी हो चार पदरी प्रकल्पाचें आतां मेरेन ७० टक्के काम पुराय जाल्ल्याची म्हायती ह्या वेळार दिली.
पळोवणे मजगतीं मुख्यमंत्र्यांनी संबंदीत अधिकार्यांक कामाचो दर्जो उच्च दवरपाचो आनी उरिल्लें काम शक्य आसा तितले बेगीन पुराय करपाची स्पश्ट सुचवणी दिली. कामाची गुणवत्ता खंयचेय परिस्थितींत तडजोड करिनासतना पुराय करप गरजेचें, अशें मुख्यमंत्र्यान ठामपणान सांगलें.
ह्या बायपास मार्गार कांय सुवातांचेर आशिल्ल्या ‘बॉटलनेक’ (अशीर आनी आडखळ निर्माण करपी सुवात) पयस करपाचेर विशेश भर दिली. अश्या सुवातांचेर रस्ते चारपदरी करपाचो तशेंच ल्हान पूल आनी हेर बांदकामां घटमूट आनी दर्जेदार करपाच्यो सुचवण्यो मुख्यमंत्र्यांनी दिल्यो.
मुख्यमंत्री डॉ. प्रमोद सावंत हांणी प्रतिक्रिया दितना सांगलें, अस्नोडा बायपास पुराय जाले उपरांत ह्या वाठारांत जावपी येरादारी कोयंडी व्हडा प्रमाणांत उणी जातली. नागरिकांक रोखडीच आनी सुरक्षीत प्रवासाची सुविधा मेळटली. हो प्रकल्प फकत येरादारी सुदारपा खातीरूच न्हय, पुराय तालुक्याची उदरगत चालीक लावपी थातलो.
तांणी मुखार म्हणलें, फाटल्या कांय म्हयन्यां आदीं हो प्रकल्प सुरू केला. हाचें काम गतीन सुरू आसा. उरिल्लें कामूय नियोजीत वेळार पुराय करपा खातीर प्रशासनान काम करचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
