भांगरभूंय | प्रतिनिधी
जोयडा : गोंय-कर्नाटक शिमेवेल्या जोयडा तालुक्यांतल्या डिग्गी वाठारांत एक दुर्दैवी घडणूक घडली. भलायकी सुविधांच्या उणावाक लागून हांगा एका दोतोराक आपलो जीव वगडावचो पडलो. डिग्गी मुळाव्या भलायकी केंद्रांत कार्यरत आशिल्ले डॉ. लेन्सर लोबो हांकां काळजाच्या आताकान मरण आयलें. वेळार उपचार मेळूंक नाशिल्ल्यान ही दुर्दैवी घडणूक घडली. हे घडणुकेन सरकारी आरोग्य यंत्रणेचे कार्यक्षमतेचेर गंभीर प्रस्न निर्माण जाला.
हे विशीं मेळिल्ले चड म्हायती प्रमाण, बिरेस्तारा रातीं डॉ. लोबो हांकां छातयेंत दुखूंक लागलें. मात, डिग्गी वाठारांत ऍम्बुलन्स उपलब्ध नासप, अपूर्ण येरादारी वेवस्था आनी मोबायल नेटवर्कची गंभीर समस्या हाका लागून तांकां रोखडीच वैजकी मजत मेळूंक ना. शुक्रारा सकाळीं स्कोडवेस संस्थेच्या वाहनांतल्यान तांकां जोयडा भलायकी केंद्रांत व्हरतना वाटेरूच तांकां मरण आयलें.
जोयडा तालुक्यात डॉक्टरांचो उणाव आशिल्ल्यान शिरसी हांगची ’स्कोडवेस’ संस्था कराराच्या तत्त्वाचेर डिग्गी भलायकी केंद्र चलयता. डॉ. लोबो फाटल्या तीन वर्सां सावन ह्या वाठारांत कार्यरत आशिल्ले. भोंवतणी रान आनी गरजेच्या सुविधां पयसून पयस आशिल्ल्या ह्या वाठारांत तांणी निस्वार्थ भावनेन दुयेतींची सेवा केली. कर्नाटक-गोंय शिमेवेले खुबशे नागरीक उपचारा खातीर तांचेर निंबून आशिल्ले. तांच्या मरणाक लागून ह्या वाठारांत दुख्ख पातळ्ळां.
मजगतीं, हे घडणुकेक लागून ‘जर डॉक्टरूच सुरक्षीत नासल्यार, सामान्य लोकांचें कितें?’ असो प्रस्न नागरीक विचारतात. ह्या वाठारांत भलायकी सेवेचो उणाव, ऍम्बुलन्स उपलब्ध नासप आनी प्रशासनाची आडनदर हाका लागूनच हो प्रकार घडिल्ल्याचें लोक सांगतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
