भांगरभूंय | प्रतिनिधी
पणजीः मंगेशीच्या आदिनारायण हॉटेला लागसार काल रातीं उसरां टेम्पो ट्रॅव्हलरान ट्रकाक धपको दिलो. ह्या अपघातांत चार प्रवासी गंभीर जखमी जाले, तातूंतल्या एका प्रवासाक फुडल्या उपचारा खातीर बांबोळीच्या गोमेकोंत व्हेलो. हेर तिगांक पयल्या उपचारा उपरांत हॉस्पिटलांतल्यान सुटका जाल्या.
मेळिल्ले म्हायती प्रमाण टेम्पो ट्रॅव्हलर म्हड्डोळ सावन कुंडय वचपाचे वाटेर आशिल्लो. मंगेशी वाठारांतल्या आदिनारायण हॉटेला लागसार ड्रायव्हरान गाडयेचेर नियंत्रण सोडलें, आनी टेम्पो फाटल्यान फुडें आशिल्ल्या ट्रकाक धपको दिलो.
जखमी जाल्ल्या सगल्या प्रवाशांक रोखडेच उपचारा खातीर मडकयच्या प्राथमीक भलायकी केंद्रांत दाखल केले. थंयच्या दोतोरांनी रोखडेंच जखमींचेर उपचार सुरू केले. ह्या अपघातांत जखमी जाल्ल्या प्रवाशांचीं नांवां नागराज हुंद्रे (२८, रा. फोंडें), नितीन गौडे (२८, फोंडे) आनी शुभम कांबळे (२४, रा. फोंडें). ह्या तिगांक गरजेची वैजकी उपचारा उपरांत तांकां हॉस्पिटलांतल्यान डिस्चार्ज दिलो. मात, ४० वर्सां पिरायेचो सुधीर सुतार (फोंडें) हांचे दुखापतीचें गांभीर्य लक्षांत घेतल्यार तांकां बांबोळेच्या गोमेकॉंत धाडले. तांची प्रकृती स्थिर आशिल्ल्याचें समजता.
हे घडणुकेची म्हायती मेळटकच म्हाड्डोळ पुलिसांनी रोखडोच थंय पावून पंचनामो केलो. पुलीस निरिक्षक योगेश सावंत हांच्या मार्गदर्शना खाला पुलीस पंगडान अपघात जाग्याची पुराय तपासणी करून पुरावे एकठांय केले. पुलिसांनी अपघाताची नोंदणी केली. फुडली चवकशी सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
