भांगरभूंय | प्रतिनिधी
संकल्प आमोणकार हांणी केलो गाडयेचो फाटलाव
पणजी: दाबोळे काल सांजेवेळार घडिल्ल्या एका हिट-अँड-रन अपघातांत ५६ वर्सां पिरायेचे बायलेक मरण. हे घडणुकेक लागून वास्को आनी दाबोळे बरोच बोवाळ निर्माण जाला. मुरगांवचे आमदार संकल्प आमोणकार हांणी दाखयिल्ल्या धाडसाक लागून ह्या प्रकरणांतल्या दुबाविताक रोखडोच धरप शक्य जालें.
आमदार आमोणकार हांणी सुमार १२ किलोमीटरां मेरेन दुबावीत वाहनाचो फाटलाव करून चालकाक धरलो आनी पुलिसांचे सुवादीन केलो. सध्या पुराय गोंयांत हें आदर्श उदाहरण म्हणून चर्चेचो विशय थारला.
हे विशीं मेळिल्ले चड म्हायती प्रमाण, शेनवारा सांजेवेळार सुमार ७.१५ वरांचेर दाबोळेच्या मुखेल रस्त्याचेर हो भिरांकूळ अपघात जालो. एक वेगान येवपी वाहन ५६ वर्सां पिरायेचे बायलेक धपको दिवन घडणुके सुवातेवेल्यान पळून गेलें. ह्या अपघातांत ती बायल गंभीर जखमी जाली.
ते बायलेचो अपघात जावचे पयली हें वाहन आमदार संकल्प आमोणकार हांच्या वाहनाक वेगान ओव्हरटेक करून गेल्लें. ती बायल अपघातांत जमनीर पडिल्ल्याचें पळयतांच आमोणकार हांणी वेळ वगडायनासतना त्या वाहनाचो फाटलाव केलो. हो फाटलाव सुमार १२ किलोमिटर मेरेन चल्लो. हाचे मजगतीं, आमोणकार हांणी मुरगांव पोर्ट, तशेंच वास्को आनी दाबोळे पुलिसांक हे विशीं म्हायती दिली. गोंयांत नवीन आशिल्ल्यान दुबावीत चालकाक गोंयच्या रस्त्यांची म्हायती नाशिल्ली. हाका लगून तांणी सरळ एमपीटी हांगा वचपी उड्डाणपुलाचो मार्ग धरलो. मुखार रस्तो बंद आशिल्ल्यान ताका गाडी थंयच थारावची पडली. उपरांत आमदार आमोणकार आनी पुलीस थंय पावले आनी पुलिसांनी ताका ताब्यांत घेतलो. ही घडणूक वास्को वाठारांत घडिल्ल्यान दुबाविताक वास्को पुलीस स्टेशनाचेर हाडलो.
ह्या पुराय प्रकरणाविशीं पुलीस अधीक्षक गुरुदास कदम हांणी खोलायेन म्हायती दिल्या. तांणी स्पश्ट केलें, आमदारांचे शिटुकसाणेक लागून दुबावीत सचिन चोप्रा (उज्जैन, मध्य प्रदेश) हाका पळून वचपाची संद मेळूंक ना आनी ताका वेळार अटक करप शक्ळ जालें. पुलिसांनी संबंदीत कलमा आड गुन्यांव दाखल केला. फुडली कायदेशीर कारवाय जातली.
मरण आयिल्ले बायल्ली बायल सिद्धम् मदार (५६) हिच्या सोयर्यांक हे विशीं म्हायती दिल्या. पुलिसांनी कूड पोस्टमार्टमा खातीर धाडल्या. ह्या वाठारांतली सीसीटीव्ही फुटेज आनी हेर पुराव्यांच्या आदारार पुलीस अदीक तपास करतात.
हे घडणुकेक लागून दाबळे वाठारंतल्या लोकां मदीं तिडक आनी भंयाचें वातावरण पातळ्ळां. वाडपी अपघातांचे फाटभूंयेर थळाव्यांनी रस्तो सुरक्षितताये विशीं खर तिडक उक्तायल्या. रातच्या वेळार वेगान वचपी वाहनांचेर नियंत्रण दवरपा खातीर पुलिसांनी खर गस्त वाडोवपाची मागणी केली. तशेंच दाबोळी ते वास्को मार्गार गरजेचे सुवातेर स्पिडब्रेकर आनी रस्त्यावेल्या लायटीची वेवस्था करपाची गरज आशिल्ल्याचें नागरिकांनी सांगलें.
रातच्या वेळार अशे तरेच्या गंभीर अपघातां उपरांत फाटलाव करून गुन्यांवकाराक धरप हें धाडसाचें काम, अशें म्हणून पुलिसांनी आमदाराची तोखणाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
