भांगरभूंय | प्रतिनिधी
पणजी ः गुन्यांव फांट्याचे कचेरे भायर पत्रकार आनी यूट्यूबर गौतम खट्टर हांच्या मदीं जाल्ल्या वादान आतां राजकी स्वरूप घेतलां. ’जागतीक पत्रकारिता स्वातंत्र्य दिसा’ गोंयच्या पत्रकारांच्या फाटल्यान राजकी फुडारी खंबीरपणान उबे रावल्यात आनी खट्टर हाच्या विधानाचा निशेध केला.
सां फ्रान्सिस झेवियर हांचेर केल्ल्या वादग्रस्त वक्तव्याक लागून धर्मीक भावना दुखायल्ल्या आरोपा खाल खट्टर हाका अटक जाल्ली. काल जामिनाचेर सुट्टकच पत्रकारांनी ताका प्रस्न विचारले, तेन्ना ताणें पत्रकारांचेच नितीमत्तेचेर आनी वागणुकेचेर प्रस्न केले. हाका लागून पत्रकार आनी खट्टर हांच्या मदीं हुज्जत जाली. पत्रकारांनी ताका मुद्याचेर चड स्पश्टीकरण दिवपाचें आवाहन केलें, पूण ताणें पत्रकारांचोच अपमान केलो.
राजकी मळार पडसाद
ह्या प्रकरणा उपरांत गोयच्या राजकीय मळाचेर खर पडसाद उबे जाल्यात.
आप : आमदार वेन्झी व्हिएगस हांणी पत्रकारांचो आदर राखपाचें आवाहन केलें. लोकांनी धर्मीक ध्रुवीकरणाक बळी पडूंक फावना, हो विशय धर्माचो न्हय. पत्रकारांच्या फाटल्यान उबे रावात, अशें तांणी म्हणलें. तशेंच आपाचे गोंय अध्यक्ष वाल्मिकी नायक हांणी खट्टराक ’त्रासदायक’ म्हणलें आनी प्रस्न विचारतल्या पत्रकारांची तोखणाय केली.
गोंय फॉरवर्ड: अध्यक्ष विजय सरदेसाय हांणी शांतताय राखपाचें आवाहन करून समाजात दुफळी निर्माण करपी गजालीं पसून पयस रावपाचो सल्लो दिलो.
कॉंग्रेस: प्रवक्ते सुनील कवठणकार हांणी खट्टर हांचीं उतरां अपमानकारक आशिल्ल्याचें सांगलें. प्रदेश कॉंग्रेसचे मिडीया विभागाचे अध्यक्ष अमरनाथ पणजीकर हांणी सांगलें की, गोंयच्या पत्रकारांच्या नीतिमत्तेचेर प्रस्न हाजीर करप हो अपमान आसा. गोंयच्या पत्रकारांनी लोकशाय घट करपाक मोलादीक वावर केला.
दुसरे वटेन, भारतीय जनता पक्षान ह्या प्रकरणाचेर अजून कसलीच प्रतिक्रिया दिवंक ना.
गोंय पत्रकार संघाचो निशेध
गोंय पत्रकार संघान (गुज) गौतम खट्टर हांच्या विधानाचो जाहीर निशेध केला. खट्टर हांचीं विधानां बेजबाबदार आसात आनी तीं गोंयचे पत्रकारितेच्या सत्याक धरून नात, अशें संघान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
