भांगरभूंय | प्रतिनिधी
पणजी ः नामनेचे व्यंगचित्रकार मारियो मिरांडा हांचे यादीन आदले आदिलशा पॅलेसींत खाशेली गॅलरी उबारपाचो निर्णय सरकारन घेतला. मारियो मिरांडा हांचे 100 वे जयंती निमतान आयोजीत कार्यावळींत ही घोशणा जाली.
कला अकादमीच्या ब्लॅक बाॅक्सांत काल शेनवारा मारियो हांच्या जयंती कार्यावळीची सुरवात जाली. तांची भयण फातिमा मिरांडा- फिगरेदो हांणी उक्तावण केलें. ह्या वेळार मिरांडा कुटुंबांतले वांगडी हाजीर आशिल्ले. उपरांत मारियो गॅलरीचे क्युरेटर जेरार्ड दा कुन्हा हांचें मारियो मिरांडाच्या जिविताचेर उलोवप जालें. ह्या निमतान मारियो हांच्या चित्रांचें प्रदर्शन आर्ट गॅलरींत जालें. तें आयज आयतारा सांजवेळार साडेसात मेरेन सगल्यांक पळोवपाक मेळटलें. हे कार्यावळींत म्हायतीपटूय दाखयलो.
म्युझियम संचालनालयाचे संचालक वासू उसपकार हांणी मारियो गॅलरी सुरू करतले अशी म्हायती दिली. ही गॅलरी आदिलशाह पॅलेसीच्या पयल्या मजल्याचेर आसतली, जंय सध्या राज्य संग्रहालयाचो कांय भाग आसा.
संचालक उसपकार हांणी सांगलें की, “हो प्रकल्प सध्या सुरुवातीच्या पांवड्यार आसा. पयलीं आदिलशाह पॅलेस इमारतीचें दुरुस्ती काम हातांत घेतलें. तें पूर्ण जातकच आर्किटेक्ट, क्युरेटर आनी कलाकारांची एक तज्ञ समिती नेमतले. ही समिती गॅलरींत चित्रां आनी हेर वस्तू कशा तरेन मांडच्यो, हाचो आराखडो थारयतली.”
हातूंत फक्त मारिओ मिरांडाच न्हय, तर लक्ष्मण पै आनी एफ. एन. सुजा सारक्या हेर नामनेच्या गोंयकार कलाकारांच्या कलाकृतीं खातीरय खाशेले विभाग आसतले. हाका लागून गोंयच्या कला क्षेत्रांतलो दैदिप्यमान इतिहास पर्यटकांक आनी कलाप्रेमींक एकाच छता खाला पळोवपाक मेळटलो.
वर्सभर कार्यावळी
मिरांडा कुटुंबा वतीन तांची नात गेल झुलैमा हांणी सरकाराच्या ह्या पावलाक येवकार दिला. “ही बरी सुरवात जाल्या. फुडल्या पुराय वर्सांत आज्याच्या कार्याचो उजवाड सगल्याक फांकोवपाक आमी आनीकय जायते उपक्रम चालीक लावपाचे आसात,” अशें तिणें सांगलें.
जेरार्ड दा कुन्हा हांचें व्याख्यान
“गोंयांत मारियो मिरांडा हांचीं चित्रां लोकांक इतलीं आवडटात की तीं खंयच्याय रेस्टॉरंट वा कॅफेंनी उक्तीं वापरिल्लीं दिसतात. जायत्या कडेन हीं चित्रां चुकीच्या पद्धतीन वा बनावट तरेन छापिल्लीं आसात, हें हुस्क्याचें कारण आसा. तांचे कलेचें अस्सलपण सांबाळप हें आमचें कर्तव्य,” अशें आर्किटेक्ट आनी मारियो गॅलरीचे क्युरेटर जेरार्ड दा कुन्हा हांणी सांगलें.
कला अकादमींत मारिओ मिरांडा हांचे जल्मशताब्दी निमतान आयोजित व्याख्यानांत तांणी मारियोच्या जिविताचेर उलोवप केलें. मारियो हांच्या जिविताचेर, कार्याचेर म्हायतीपटूय दाखयलो. हे कार्यावळीक काल आनी आयज रसिकांनी व्हड संख्येन उपस्थिती लायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
