भांगरभूंय | प्रतिनिधी
नवी दिल्ली: दिल्लीच्या शाहदरा वाठारांतल्या विवेक विहारांतल्या चार माळयेच्या इमारतीक आयतारा सकाळीं उजो लागलो. हे घडणुकेंत ९ जाणांक मरण आयलें. रेस्न्यु करतना आनी उजो पालयतना १० ते १५ जाणांक वाटयले. तातूंतले दोग जखमी जाले.
घडणुके सुवातेर पाविल्ले भाजपा आमदार संजय गोयल हांणी सांगलें, सकाळीं सुमार ३:४५ वरांचेर हो उजो लागलो आनी रोखडोच इमारतीच्या चारय माळयांनी पातळ्ळो. कांय जाण दाराचें कुलूप उगडूंक शकले नात, हाका लागून तांकां मरण आयलें. कांय जाण सामके लाशिल्ल्यान तांचो सांगाडोच उरला.
हाका लागून तांची डीएनए चांचणे वरवीं जातली. पुलिसांनी वळख पटपा खातीर मेल्ल्या कुडींचे फोटो काडल्यात. संजय गोयल हांच्या मतान, हे घडणुके फाटलें शॉर्ट सर्कीट हें मुखेल कारण सांगतात. मात कांय थळावे लोक एसींत जाल्ल्या स्फोटाक लागूनय ही घडणूक घडिल्ल्याचें सांगतात.
सकाळीं सुमार चार वरांचेर आमकां उज्या विशीं म्हायती मेळ्ळी अशें शाहदरा डीसीपी राजेंद्र प्रसाद मीना हांणी सांगलें. इमारतींतल्या ५-६ फ्लॅटांनी उजो पातळिल्लो. वेगवेगळ्या माळयेंतल्यान लोकांच्यो कुडी मेळ्ळ्यो. पयले माळयेर एक कूड, दुसरे माळयेर ५ कुडी आनी हेर ३ कुडी सांपडल्यो.
१० परस चड उजो पालोवपी दळाच्यो गाडयो थंय पावल्यो. बाल्कनी आनी जनेलां वयल्यान सुमार १५ जाणांक वाटयले. तातूंतल्या दोग जाणांक बारीक दुखापत जाल्ल्यान हॉस्पिटलांत दाखल केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
