गटारांतलो पेटो

भांगरभूंय | प्रतिनिधी

”पापा, लोक कित्याक म्हणून मॉनजाती कडेन अशे दुश्टपणान वागतात रे…” ताणें म्हणलें. म्हजे कडेन जाप नाशिल्ली!!!

चली सांजवेळा गणिताच्या ट्युशनाक ताळगांवां वच. हांव ताका हाडपाक स्कूटर घेवन ट्युशन मास्तराच्या घरा वच. तें अकरावेक आसतलें. असोच एक दीस हांव ताका परत  व्हरपाक म्हणून वाट पळयत उबो आसलों. तें आयलें आनी ताणें म्हळें, ”पापा, तुका आयकूंक येना रे? एक कुत्र्याचो पेटो सामको आकांतान रडटा मरे…” सरभोंवतणी काळोख. रातची साडे सात- आठ वरां जाल्लीं.

ताणें अशें विचारतकच म्हज्या तें लक्षांत आयलें. खरेंच एक पेटो खंय तरी आशीकुशीक किलाट्टालो. हांवें ताचे वांगडा हे वटेन ते वटेन सोदपाक सुरवात केली. आनी एकाच वांगडा आमकां एक सामको 10-15 दिसांचो सुण्यापेटो वालेतींत दिश्टी पडलो. एका खळयेंत कसो तो पडिल्लो आनी बाबडो रडटालो. हांव सकयल देंवलो आनी ताका वयर हाडलो. आशीकुशीक पळयलें, आवय बी आसा काय. कोण ना. बुरसो जाल्लो. चली म्हणपाक लागलें, ”पापा, हांगां तो मरतलो. ताका घरा व्हरूया.” म्हजेर धर्मसंकश्ट!… आमी रावता सव्या मजल्यार!

ताणें ताका वेंगांत घेतलो आनी आमी स्कूटरीन घरा आयलीं. चलयेन म्हज्या आदारान ताका ओल्या आंगशान पुसून काडलो. ताका एक दोन कडेन जखमो आशिल्ल्यो थंय कापसान आनी डॅटोलाना ताच्यो जखमो पुसल्ल्यो, ताचेर बॅटाडीन लायलें. ताका वाटयेंत दूद घालून दिलें. ताका जिवाक बरें दिसलें जावंक जाय. तो न्हिदलो. 

आमी कॉलनींत इमारतीच्या सव्या मजल्यार. थंयच वारांदांत कागदां बी घालून ताची न्हिदपाची व्यवस्था केली.

बायलेन चलयेक आनी म्हाका ताकीद दिली… हांगां पेटो बी पोसप शक्य ना…

चलयेन तिचे कडेन दुर्लक्ष केलें. दोन-तीन दीस गेले. मजगतीं, पेट्याक व्हॅटा कडेन व्हरून इंजीसांव बी करून हाडलें. तो चलयेच्या फाटल्यान बागडपाक लागलो. चलये परस धाकटो चलो आठ वर्सांनी ल्हान. ताकाय मजा येवपाक लागली. पूण घरांत पेटो नाका हें स्पश्ट जातकच चलयेन व्हॉटसॅपाचेर पेट्याच्या अॅडॉप्शनाची खबर चालू केली. रोखडोच तिका प्रतिसाद मेळ्ळो. मजा म्हणल्यार ताच्या हायर सेकंडरींतल्या एका शिक्षिकेन ताका पेटो हाड म्हणून सांगलें. चार दिसांनी आमी ताका स्कूटरीर घेतलो, वांगडा दूद बी घेतलें आनी पर्वरे काडून फुडें एका घरांत शिक्षिकेसरीं गेलीं. ती आनी तिची आवय घरांत. पेटो हाडला म्हणटकच शेजारची भुरगीं आयलीं. शिक्षिका मायेची आनी प्रेमळ. तिणें ताका अपूरबायेन वेंगांत घेतलो. मागीर आमी वचपाक लागलीं तर तो आमच्या फाटल्यान येवंक लागलो. बाटलेंतलें दूद ताका वाटयेंत घालें आनी तो पियेता तशीं आमी फाट परतून स्कूटरी कडेन वचूंक लागलीं. चलयेचे पांय ओडटाले. दोळे भरून आयिल्ले. हांवें ताच्या फाटीर हात ओडलो. लागीं एका गाड्यार ताका सोदाची बाटली पियेवंक दिली. आमी ताका मदीं- मदीं येवन पळोवया अशें समजायलें आनी आमी घरा आयलीं. चलयेक ताची याद जाताली. शिक्षिका ताका व्हॉटसॅपार खबर आनी फोटोय धाडी.

 देड-दोन म्हयन्यांनी आमी ते वटेन वतना म्हणलें, पेट्याक पळोवया. आमी स्कूटर शिक्षिकेच्या घरा कडेन थांबयली आनी घरा कडेन गेलीं.  कितें सांगूं… आमकां पळयलीं आनी तो आतां बरोच व्हड जाल्लो पेटो आमचेर उडयो मारून आमकां चाटपाक लागलो. गळ्यांत सांखळी आशिल्ल्यान माणसुकी. ना तर तो आमचे फाटल्यान येवपाचो ! शिक्षिका घरा नाशिल्ली. तिची आवय आसली. आमी अचानक ताका पळोवपाक म्हणून गेल्ल्यान ताका खावपाक म्हणून कांयच व्हेलेंना. आमकां खूब वायट दिसलें. हांवें चलयेक समजायलें. दुसरे खेपो मुद्दाम येवया, खावपाक घेवन येवया. ताणें आं… म्हळें. वाटभर ताच्योच गजाली करीत आमी घरां आयलीं. ताका पळोवन आमी खुशालभरीत जाल्लीं.

मदीं परिक्षा बी जाली… आनी स- सात म्हयने मदीं गेल्या आसतले. आमी एकदीस खावपाक बी घेतलें आनी पेट्याक पळोवपाक गेलीं. आमी लागीं पावतकच चली सामकेंच अॅक्सायट जाल्लें… आमी तांच्या घरा पावलीं. वाट एका भाटांतल्यान कशी. घरा पावत तर दार बंद आनी भायर फकत सांखळी….

हांवें दारार मारलें. शिक्षिकेच्या आवयन दार उक्तें केलें आनी, चलयेन विचारलें… ”कुतू खंय?

तिणें तोंडार पदर ओडलो आनी म्हणपाक लागलीं… ‘ बाय कितें सांगूं…कुतू केदो व्हडलो जाल्लो… आठ दिसां फाटीं तुमी वाचूंकना पेपरार? ह्या वाठारांत कोणेंतरी वीख जेवणांत घालून दवरून चार म्हशी मेल्ल्यो (माल्ल्यो) शेतांत वतात म्हणून.. तें विख्ख आमच्या पेट्यानय खालें जावंक जाय…. तोय मरून पडिल्लो…. आमकां खूब वायट दिसलें… कितें करतलीं…. म्हाका सामको धक्को बसलो. हांवें चलयेचो हात हातांत घेतलो. ताचे दोळे भरून आयिल्ले. 

“कितें रे हें पापा? ताणें रडकुऱ्या आवाजांत म्हणलें. ताच्या हातांतल्यो बिस्कुटी आनी हेर खाण जमनीर पडलें… शेजाऱ्याची दोन भुरगीं एदें तोंड करून पळयतालीं.. हांवें चलयेंक हाताक धरून स्कूटरी कडेन हाडलें.

 ”पापा, लोक कित्याक म्हणून मोनजाती कडेन अशे दुश्टपणान वागतात रे…”ताणें म्हणलें. म्हजे कडेन जाप नाशिल्ली.!!!

प्रकाश वामन कामत

94224 43093