भांगरभूंय | प्रतिनिधी
मनशाक तो मोटो दिसूं वा ना दिसूं पूण कोणेंय दुसऱ्यान ताका मोटो म्हणल्यार ताका तें मात्तूय आवडना, हय तर! म्हज्या अणभवानूच ही गजाल हांव सांगतां. हांव जल्मत्नाच मोठें म्हणून म्हजी मम्मी म्हाका जायते फावट सांगता. आपूण तूं जायसर सोडाच पिवून दीस सारताली कारण एकूय जेवणाची उंडी आपल्या पोठांत उरनासली अशें ती म्हणटा. ह्याच कारणाक लागून ते साडाच्या गॅसीक लागून जल्मतनाच हांव 3.8 किलांचे जल्मलें अशें म्हाका केन्नाय दिसता. म्हाका नोर्मली ह्या जगांत हाडपाक तिणें कितले कश्ट काडले हें केन्ना केन्ना चिंतून हांव आवय जावन म्हजे कश्ट तिच्या मुखार कांयच न्हयशे म्हाका दिसूंक लागल्यात. ती खबर सोड! गॅस म्हजे भितर भरल्या म्हणून हांव जल्मतावनूच मोठें हें म्हजें म्हण्णें. पूण लोकांक मात हें म्हजें म्हण्णें पटना.
म्हजी आवय तशी बारीक, तिका म्हज्या कुशीक उबी केल्यार ती म्हजी भयण म्हणून लोकांक गैरसमज खूब फावटी जाला. मागीर तांचो तो गैरसमज हांवें तिका “मम्मा” म्हणल्या उपरांत पयस जाता. आतां सोडाचे गॅसीक सोडून ल्हान आसतना खूबश्या वस्तूंक लागून म्हजें वजन बरेंच वाडलें खंय. पूण तातूंत खऱ्यांनीच म्हजी कसलीच चूक नासली. आमच्या आज्याच्या घरा शेत आशिल्ल्यान ताचे कडेन त्या काळार खुबशीं म्हसरां- पाडे, रेडे, गायो आशिल्ल्यो. तो सकाळीं उठून दूद घेवन खंय सायकलीन वार्केच्यान मडगांवा येतालो. 4 म्हयन्यांचें आसतनाच खंय मम्मान म्हाका आपल्या दुदा वांगडाच गायेचें दूद पिवोवपाक सुरवात केल्ली. गायेचें 1 लिटर दूद हांव दिसाक पियेतालें म्हटल्यार जाता. आतां कोणाकूच सांगल्यार तिचें म्हणणें सत दिसचें ना, पूण म्हज्या मम्मीन सांगलां म्हणटकच तें फट आसचें ना. हें कोणूय दोतोर बीन वाचत जाल्यार ताका म्हज्या आवयची तोखणाय करचीच पडटली.
आतांचे पिडियेट्रीशन तर “आवयचें दूद सोडून आनी कसलेंय भायलें दूद जावं दुदाचे पावडर बाळकाक पिवपाक दिवचे न्हय” म्हणून आदीं फुडेंच आवयक स्पश्ट सांगतात. पूण म्हज्या मम्मीच्या मनाक तें मानूंक ना जायत कारण तिची तयारी म्हाका “कौन बनेगा सबसे मोठा” अशी सर्त बीन आसा जाल्यार म्हाका धाडपाची आशिल्ली जायत. म्हाका दिसांतल्यान 4 फावटी तरी गायेचें दूद ती पिवयतालीच म्हणून ती म्हाका केन्ना केन्ना सांगं. तर इतल्या सगट दुदाचें कोंत केल्यार सादाराण 1 लिटर अदीक दूद हांव दिसाक पियेतालें म्हटल्यार जाता. सांगपाची गजाल म्हणल्यार दूद, पेज, खिचडी हे जिनस ल्हानूच आसतना म्हाका नेमान खावयिल्ल्यान हांव बोमाड्या भशेन फुलत गेलें.
भुरग्यांक घराकडेन मोगान तांचीं घरचीं “नानू” , “शानू”, “बुनू”, “शुनू” म्हणून उलो करतात. म्हजें तशें नासलें, म्हाका मोगान “मोटू” म्हणटालीं. हें नांव फक्त घरांतल्यांकूच न्हय तर सोयऱ्यांक लेगीत मानवल्लें. पाड पडिल्लीं खंयचीं! आपुणूय म्हाका “मोटू” म्हणटालीं. उपरांत वाडटां वाडटां म्हज्या खावपाच्या संवयेक लागून हांव नाका जाल्ल्यो वस्तू खावन अदीक फुल्लें. पोठार ताबो उरना तेन्ना तोंड कशें बंद उरतलें? सांगात पळोव्या. उरूंकूच नज. खावप हो म्हज्या जिणेचो नेम जाल्लो, डायटिंग लेगीत करपाक गेल्यार जिवाचेर आकांत येतालो. इतली वर्सां खायत-पियेत आयिल्लो मनीस मदींस उपास-तपास करूंक लागल्यार पोठांतली नाडी वग्गी बसतली व्हय?
मागीर कॉलेजीक वतना हो नेम तोडपाक म्हाका नाका पुरो जालें. तेन्ना म्हज्या जिबेच्या पोंताक चिमटो काडूंक पडलो. बसींत वतना “मोटेल्या” हें उतर म्हाका संवकळीचें जाल्लें. तरी लेगीत धाडस करून तेच बसीन कॉलेजीक यो-वच करप जातालें. कितें करप? पर्याय नासलो. त्या वेळार ती एकूच बस म्हाका मेळटाली आनी ते बसींत प्रवास करपी दुसऱ्या कॉलेजीचे तेच तवनास भुरगे. सोड! मोठें आशिल्ल्यान जिणेच्या प्रवासांत खूबशीं उतरां वेग वेगळ्या प्रसंगाचेर कानार पडलीं. “बुडकुल्या” “खोजन्या” “पोणोस” “भोबऱ्या” “बोटाट्या” तूं मोटें आसल्यार हातुंतलें एक तरी उतर तुकाय संवकळीचें लागतलेंच. म्हाका तर सगळ्यांचीच संवयशी पडिल्ली.
म्हज्या कुडिचेर कसलो तरी उपाय करून मातशे तरी बारीक जावपाक म्हणून धाडस करून जिमाक वचपाची म्हजी येवजण हांवें म्हज्या एका इश्टाक सांगली. तेचे वरवीं हांवें जीम जॉयन केलें. दोन अडेज वरां दर दीस वर्कआवट करून करून म्हजें वजन 30 किलां वयर देंवलें. म्हजें वजन कॉलेजीक आसतना अर्दान देंवलें तें पळोवन, शाळेंतल्यो म्हज्यो टिचरी वळखूंक विसरल्यो. हांव म्हाकाच हारश्यांत पळोवन अजाप जालें. म्हज्या सोयऱ्यांक हांव दुयेंसाक सांपडलां अशें दिसूंक लागलें, कांय जाणां म्हज्या खबरेक लेगीत येवून गेल्लीं.
म्हज्या शब्दसंग्रहांतल्यान “मोटेल्या” हें उतर त्या काळार ना नपयत जालें. खुबशीं वर्सां ताचे उपरांत फिगर मॅण्टेन करपाचो यत्न चल्लो, पूण आयज घडयेक तें “मोटेल्या” उतर परत आपणावपाचो वेळ आयला, कारण दोन भुरग्यांची आवय जाल्ल्यान कुडीचो परत एकदां फुटबॉल जाला.
सियालिनी फेर्नांडीस
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
