भांगरभूंय | प्रतिनिधी
मोईन खान हाच्या घरच्यांचो वाळपय पुलिशेचेर आरोप
भांगरभूंय । प्रतिनिधी
वाळपय : एके चलये कडेन आशिल्ल्या प्रेमसंबंदांतल्यान तरणाट्याचेर तिच्या आवय- बापायन तशेंच दुसऱ्या मोग्या कडल्यान मारबडय केल्ल्याचो प्रकार उजवाडाक आयला. ह्या संबंदांत कागाळ दिवपा खातीर वाळपय पुलीस स्टेशनाचेर गेल्ल्या मोईन खान हाकाच पुलिसांनी अटक करून मारपडय केल्ल्याचो गंभीर आरोप ताच्या घरच्यांनी केला. ही घडणूक आयतारा रातीं घडली. ह्या प्रकारा उपरांत निरशेल्ल्या आनी खुबूच मानसीक चेपणा खाला गेल्ल्या मोईन खान हाणें घराच गोळ घेवन आत्महत्या केली. ताचे आत्महत्येक चलयेचो आवय- बापूय, तिचो दुसरो मोगी तशेंच पुलीस यंत्रणाच जापसालदार आशिल्ल्याचो आरोप केला.
हे घडणुकेचो निशेध करचे खातीर वाळपय पुलीस स्टेशना मुखार व्हड प्रमाणार लोकांनी आंदोलन केलें. संबंदीत पुलीस निरिक्षक आनी उपनिरिक्षक हांकां तत्काळ निलंबीत करून तांची बदली करची, अशी नेटाची मागणी तांणी केली. जे मेरेन कारवाय जायना, ते मेरेन ठिय़्या आंदोलन चालूच दवरपाची शिटकावणी आंदोलन करप्यांनी दिल्या. ताका लागून वातावरणांत तणावाचें वातावरण निर्माण जालां.
वाळपय रावपी मोईन खान हाचें एके चलये कडेन मोगाचे संबंद आशिल्ले. ही गजाल चलयेच्या घरच्यांक कळ्ळे उपरांत तांणी खान हाका खूब खेपे मारबडय केली आनी जिवेशी मारपाच्यो धमक्यो दिल्ल्याचो आरोप आसा. हे संबंदांत कागाळ दिवपा खातीर खान पुलीस स्टेशनार गेलो तेन्ना कागाळ नोंद करून घेवचे बदला पुलिसांनी ताकाच अटक केल्ल्याचो आरोप खानाच्या घरच्यांनी केला. तशेंच पुलीस कोठडेंत ताका मारबडय केल्ल्याचेंय म्हणलां. ताचे कुडीचेर मारबडय केल्ल्याच्यो खुणो स्पश्ट दिसताल्यो, असो दावो तांणी केला. ह्या प्रकरणांतलो चवकशी अधिकारी उपनिरिक्षकाचेर तांणी दुबाव उक्तायला. पुलीस कारवाये उपरांत मोईन खान खुबूच मानसीक चेपणा खाला आशिल्लो. इश्टा कडल्यानूय ताका अपमानाची वागणूक मेळटाली, हे खातीर तो कांय दीस घरांतलो भायर सरूंक नाशिल्लो. अखेर बुधवारा रातीं ताणे घरांतूच गोळ घेवन आत्महत्या केली. पुलिसांनी योग्य वेळार कागाळ नोंद करून दुबावितांचेर कारवाय केल्ली जाल्यार हो वेळ येवचो नाशिल्लो, असो दावो खान हाच्या घरच्यांनी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
