भांगरभूंय | प्रतिनिधी
पणजी : पीडब्ल्यूडी कामगार पुरवण सोसायटीचे कर्मचारी फाटल्या कितल्याशाच वर्सां सावन कंत्राटी वा तात्पुरत्या स्वरूपाचें काम करतात. ह्या कर्मचार्यांक कायम करचे, तशेंच ही प्रक्रिया पुराय जाय मेरेन तांकां नियमीत कर्मचार्यां प्रमाण रजा, वेतन दिवप गरजेचें. आमची मागणी पुराय जालींना जाल्ल्या टप्प्याटप्प्यान आंदोलन आनीक खर करतले अशी शिटकावणी अॅड. अजय प्रभुगांवकार हांणी दिल्या. शुक्रारा आझाद मैदानांत तांणी माध्यमां कडेन संवाद केलो. ताचे पयलीं राज्यभरच्या सोसायटी कर्मचार्यांनी धरणें आंदोलन केलें.
प्रभू गांवकार हांणी, सोसायटीच्या कर्मचार्यांक २००३ सावन कायम करपाचें फटीचें आस्वासन दितात. मात आयज २३ वर्सां जालीं तरी हीं आस्वासनां पुराय जावंक ना. सध्या ह्या कर्मचार्यांक कायम करप ना अशें षडयंत्र सुरू आसा. हाचे आड सरकाराक जाप विचारपा खातीर आयज आमी एकठांय आयल्यात. सोसायटीचे कर्मचारी नेमान आशिल्ल्या कर्मचार्यां प्रमाणून बिलिंग, डेटा एन्ट्री वा एमटीएसची कामां करतात. मात तांकां कायम आसपी कर्मचार्यांचे तुळेंत उणें वेतन दितात.
ह्यान पयलीं कर्मचार्यांक रोजंदारी प्रमाण वेतन दिताले. पांच वर्सां पयलीं आमी आंदोलन केले उपरांत कांय जाणांक तात्पुरतो दर्जो दिलो. २००३ उपरांत पीडब्ल्यूडी मंत्री आशिल्ल्यांनी फकत आपल्या मतदारसंघातल्या कर्मचार्यांक कायम केले. हेर कर्मचार्यांची जापसालदारी घेवपाक कोणूच तयार ना. हालींच सर्वोच्च न्यायालयन दिल्ल्या ह्या निर्णयाच्या आधारार गोंयच्या ह्या कर्मचार्यांक कायम करप शक्य आसा. मात हे खातीर राजकी इत्साशक्तींची गरज आशिल्ल्याचें प्रभुगांवकार हांणी सांगलें.
कारणा बगर त्रास दिवचे न्हय
आमी आंदोलन सुरू केल्ल्याक कांय कर्मचार्यांक खात्यांतले अभियंते त्रास दितात. कर्मचार्यांक मुद्दम लक्ष करतात. न्याय मागपा खातीर आंदोलन करप हो आमचो हक्क आशिल्ल्यान कर्मचार्यांक कारणा बगर त्रास दिवप बंद करापक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
