भांगरभूंय | प्रतिनिधी
दिगंबर कामत : प्रकल्पाच्या कामाचो घेतलो नियाळ
भांगरभूंय । प्रतिनिधी
पणजी : गोंयचे नदरेन सामको म्हत्वाचो आनी सगलेच वाट पळयतात त्या पर्वरी इलिव्हेटेड कॉरिडोराचें काम सध्या निमाण्या टप्प्यांत आयलां. नियोजीत मुजती पयलींच म्हणल्यार चवथी पयलींच ह्या कॉरिडोरचें उक्तावण करतले, अशी म्हत्वाची घोशणा भौशीक बांदकाम मंत्री दिगंबर कामत हांणी दिली.
ह्या निर्णयाक लागून ह्या रस्त्या वयल्यान कामा निमतान प्रवास करपी कामगार वर्गाक आनी पर्यटकांक व्हड सुशेग मेळटलो. येवपी चवथीक गणपतीक येवकार आनी विसर्जनूय ह्या नव्या इलिव्हेटेड मार्गा वयल्यान जातलें, अशीय म्हायती तांणी दिली.
आयज हॉटमिक्सिंग कामाचें उक्तावण जालें. ह्या वेळार पर्वरीचे आमदार रोहन खंवटे, साळगांवचे आमदार केदार नायक तशेंच प्रकल्पा कडेन संबंदीत कंत्राटदार आनी अभियंते हाजीर आशिल्ले.
पर्वरे हो भाग पणजी आनी उत्तर गोंयाक जोडपी मुखेल महामार्ग आशिल्ल्यान ह्या मार्गार सदांच येरादारेची कोंयडी जाता. पर्वरी जंक्शना वयल्या वाडपी गाडयांच्या आंकड्याक लागून जावपी कोंयडी टाळपा खातीर हो इलिव्हेटेड कॉरिडोर उबारतात. आतां हो प्रकल्प वेळा पयलींच पुराय जाल्ल्यान ह्या मार्गा वयली येरादारी पुरायेन सुरळीत जातली. प्रवाशांचो वेळ वाचतलो आनी प्रवासूय बरे तरेन जातलो.
बांदकाम मंत्री दिगंबर कामत हांणी ह्या प्रकल्पाच्या कामाचो सविस्तर नियाळ घेतले उपरांत तांणी ही घोशणा केली. कामाचे गुणवत्ते कडेन कसलेच तरेची तडजोड करिनासतना वेळार काम पुराय करपा खातीर संबंदीत अधिकार्यांक आनी कंत्राटदाराक खर सुचवण्यो दिल्यो.
गोंयांत चवथीच्या काळांत रस्त्यार भाविकांची आनी गाडयांची व्हड कोंयडी आसता. अशा वेळार पर्वरी इलिव्हेटेड कॉरिडोर सुरू जाल्यार ही कोंयडी टाळपाक व्हड मजत जातली. थळावे लोक आनी भावीक ह्या नव्या पुला वयल्यान बाप्पाक येवकार आनी विसर्जन उमेदीन आनी वेळार करपाक शकतले. थळाव्यांनी आनी प्रवाशांनी हे घोशणेक येवकार दिला. हो प्रकल्प पुराय जाले उपरांत गोंयच्या मुळाव्या सुविधांनी आनीक एका म्हत्वाच्या घटकाची भर पडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
