भांगरभूंय | प्रतिनिधी
युक्तिवाद पुराय, शेनवारा जातलो निकाल जाहीर
भांगरभूंय । प्रतिनिधी
पणजी : वास्को एके भौशीक कार्यावळींत सेंट फ्रान्सीस झेवियर हांचे विशीं आक्षेप घेवपा सारकें विधान करून गोंयांत धर्मीक नसाय निर्माण केल्ल्या प्रकरणांत अटक केल्लो दुबावीत गौतम खट्टर हाच्या जामीन अर्जाचेर वास्को प्रथमवर्ग न्यायालयान आपलो निमाणो निर्णय राखून दवरला. ह्या प्रकरणा वयलो युक्तिवाद बिरेस्तारा पुराय जाला. शेनवारा 2 मे ह्या दिसा सकाळीं 10 वरांचेर हाचेर निमाणो निकाल जाहीर करतले.
बिरेस्तारा जाल्ले सुनावणे वेळार दुबावीत गौतम खट्टर हाचे वटेन बाजू मांडटना अॅड. अमेय प्रभुदेसाय हांणी युक्तिवाद केलो. तांणी न्यायालया मुखार स्पश्ट केलें, ह्या प्रकरणाचो तपास करचे खातीर वा गुन्यांव सिद्ध करचे खातीर दुबाविताचे पुलीस कोठडेची आतां कसलीच गरज उरूंक ना. अॅड. प्रभुदेसाय हांणी युक्तिवादांत सांगलें, पुलिसांनी ह्या प्रकरणा कडेन संबंदीत सगले तंत्रीक पुरावे आदींच एकठांय केल्यात. तातूंत मुखेलपणान संबंदीत आक्षेप घेवपा सारकें व्हिडियो रिकॉर्डींग आनी दुबाविताच्या व्हॉयस रेकॉर्डींगाचो आस्पाव आसा. तशेंच एकठांय केल्ल्या आवाजाचे नमुने फुडली खोलायेन तपासणी आनी पडटाळणे कातीर पुण्याच्या फॉरेन्सीक तज्ञां कडेन धाडल्यात. ताका लागून तपासांत कसलीच आडखळ येना. तशेंच दुबाविताचो जामीन न्हयकारपाक कसलेंच ठोस कारण ना, असो दावो बचाव पक्षा वतीन केलो. मजगतीं, ह्या प्रकरणांतलो फुडलो आदेश आनी जामिना वयली सुनावणी आतां शेनवारा 2 मे ह्या दिसा जातली.
हे अटकेची फाटभूंय पळयलीं जाल्यार वास्कोचे जाहीर कार्यावळींत आक्षेप घेवपा सारकें विधान करीत सावन गौतम खट्टर गोंयांतल्यान पळून गेल्लो. तो हिमाचल प्रदेशांतल्या कुल्लू जिल्ह्यांतल्या एका दुर्गम वाठारांतल्या मरालचे दोंगुल्ले वयले श्री नीळकंठ देवूळ वाठारांतल्या एका घरांत लिपून बशिल्लो. गोंयांतल्यान पळून गेले उपरांत ताणें आपलो मोबायल फोन पुराय बंद दवरिल्लो. ताका लागून ताचो सोद घेवप पुलिसां खातीर एक व्हड आव्हान जालें. मात, गोंय गुन्यांव फांट्याच्या पंगडान फिशालकायेन उत्तराखंड ते हिमाचल प्रदेश असो फाटलाव केलो.
तंत्रीक तपास आनी गुप्त म्हायतीच्या आदारान पुलिसांनी ताची नेमकी सुवात सोदली. पुलिसांनी ताचे आड लूक आवट नोटीस आनी आजामीनपात्र वॉरंट जारी केलें. पुलिसांची सुलूस लागताच ताणें थंयच्यान पळून वचपाचो यत्न केलो, पूण हिमाचल पुलिसांनी मरालच्या तपासणी नाक्याचेर सांपळो रचून ताका ताचे मोटारी सयत ताब्यांत घेतलो. 24 एप्रीलाक सांजे वेळार ही कारवाय येसस्वी तरेन पुराय केली. ते उपरांत गोंय गुन्यांव फांट्याचे निरिक्षक परेश नायक, पुलीस उपनिरिक्षक माधव नायक आनी हवालदार नवीन पालयेंकार हांच्या पंगडान ताका तीन दिसांच्या ट्रान्झीट रिमांडाचेर आयतारा दनपारां गोंयांत हाडलो आनी उपरांत रायबंदराच्या गुन्यांव फांट्यांत हाडलो. आयतारा ताका वास्को प्रथमवर्ग न्यायालयांत उबो केलो, तेन्ना न्यायालया कडल्यान ताका स दिसांची पुलीस कोठडी फर्मायल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
