भांगरभूंय | प्रतिनिधी
मंत्री रोहन खंवटे : भाशिणी वांगडा समाजाकायेची कबलात
भांगरभूंय । प्रतिनिधी
पणजी : एआय भितर कोंकणीचो आस्पाव जावचो हे खातीर कोंकणी लार्ज लेन्गवेज मोड्यूल (एलएलएम) तयार करपाक सुरवात केल्या. हे एलएलएमचे अंमलबजावणी खातीर आमी भाशिणी वांगडा समजातकायेची कबलात केल्या. कांय दिसांनी कोंकणींतल्यान एआयचो वापर सुरू जातलो, अशी म्हायती म्हायती आनी तंत्रज्ञान मंत्री रोहन खंवटे हांणी दिली.
सद्या एआय हेर भाशेंत मुखार आसत मात कोंकणीचे बाबतींत एआय अजून कच्चो आसा. चॅट जीपीटी, डिपसीक सारकिल्ले एआय कोंकणीचे कमांड घेनात. तशेंच इंग्लिशेचो कोंकणी अणकार मराठींत करून दितात आनी हातूंत चडश्या मराठी उतरांचो आस्पाव आसता. सद्या गुगल जेमिनीन एआयन कोंकणीचो मात्सो हात घट्ट धरला. जर कमांड सोडल्यार इंग्लिशेचो कोंकणींतल्यान अणकार 80 टक्के सारको आसता.
अमेरिकेंत रावपी गोंयकारान गुगला भितर कोंकणी भास तयार केली. मडगांव रावपी आनी गोंय आभियांत्रीक म्हाविद्यालयाचो आदलो विद्यार्थी संजीत हेगडे देसाय हांणी ही कामगिरी केल्या. आतां आमी एक पावल फुडें वचून भाशिणी वांगडा समाजाकायेची कबलात करून आमी एक कोंकणी एलएलएम तयार करतात, अशें खंवटे हांणी सांगलें.
ह्या माध्यमातल्यान कोंकणीचीं सगलीं उतरां जाग्यार पडटलीं आनी लोकांक एयआयचो वापर कोंकणींतल्यान करपाक शक्य जातलें. हाचे फुडें मजकूर इंग्लिशेंत घातले उपरांत ताचो स्पश्ट अणकार कोंकणींतल्यान जातलो. ही एक बोली भास आसा ताका वेळ लागतलो आनी एका रातीं भितर हें जावपाक शकना. कांय दिसांनी कोंकणी आमकां एआयचेर पळोवपाक मेळटली, अशी म्हायती खंवटे हांणी दिली. तशेंच सरकारी सेवा कोंकणी आनी मराठी भाशेंत उपलब्ध आसतल्यो. ’चॅटबॉट्स’ आनी हेर एआय माध्यमां वरवीं लोकांक 24 वरां सरकारा कडेन संवाद सादपाक शकतले. पर्यटन, शेतकाम, भलायकी आनी शिक्षण ह्या मळांचेरूय एआयचो उपेग जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
