भांगरभूंय | प्रतिनिधी
पावसा उपरांत खंयच्या खिणाक वेंचणूक घेवपाचे संकेत
मुख्यमंत्री आनी दामू नायक हांणी घेतली राष्ट्रीय अध्यक्षांची भेट
वेंचणुके खातीर संघटण घटमूट करपाचेर दिल्लींत जाली चर्चा
भांगरभूंय । प्रतिनिधी
पणजी : सध्याचे गोंय विधानसभेची मुजत मार्च 2027 त सोंपता, पूण ते पयलींच विधानसभा वेंचणूक जावपाचे संकेत मेळटात. नोकरभरती सयत उदरगतीचीं कामां नेटान सुरू आसतना वेंचणुके खातीर संघटणा घटमूट करपाचेर थळाव्या फुडाऱ्यांची चर्चा जाली. पावस सोंपले उपरांत खंयच्याय खिणाक वेंचणूक जावपाची शक्यता आसा.
मुख्यमंत्री डॉ. प्रमोद सावंत तशेंच प्रदेश भाजप अध्यक्ष दामू नायक हांणी बिरेस्तारा राष्ट्रीय अध्यक्ष नितीन नबीन हांची भेट घेवन तरेकवार विशयांचेर चर्चा केली. संघटणा घटमूट करपा सयत फुडल्या कार्यावळींचेर चर्चा जाली, अशी म्हायती प्रदेश भाजप अध्यक्ष दामू नायक हांणी दिली. राष्ट्रीय अध्यक्ष नितीन नबीन हांची भेट घेवन सांजे वेळार दामू नायक गोंयांत पावले. मुख्यमंत्री मात दिल्लींतूच आशिल्ले. मुख्यमंत्री डॉ. प्रमोद सावंत हांणी उपरांत केंद्रीय दळणवळण मंत्री ज्योतिरादित्य सिंदिया हांची भेट घेतली.
फोंडें पोटवेंचणूक 9 एप्रीलाक जावपाची आशिल्ली. आदल्या दिसा फोंडें पोटवेंचणूक रद्द करपी निवाडो मुंबय उच्च न्यायालयान दिलो. फोंडें पोटवेंचणूक रद्द जाले उपरांत पयलेच खेपे मुख्यमंत्री तशेंच प्रदेश अध्यक्षान राष्ट्रीय अध्यक्षांची भेट घेतली.
विधानसभेचो कार्यकाळ सोंपपाक अजून 10 म्हयन्यांचो कार्यकाळ आसा. तरी लेगीत गोंयांत वेंचणुकेची तयारी सुरू जाल्या. आचारसंहितेक लागून उदरगतीच्या वावराचेर परिणाम जावचो न्हय म्हूण नगरपालिका वेंचणुको लेगीत फुडें धुकलल्यात. मुख्यमंत्र्यां सयत हेर मंत्र्यां कडल्यान घोशणा जावप चालू आसा. हाका लागून मुजती पयली वेंचणूक जावपाचे संकेत मेळटात.
पर्वरी इलिवेटेड कॉरिडॉरचो वावर नेटान चालू आसा. इलिवेटेड कॉरिडॉर पुराय करपाची ऑक्टोबर ही डेडलायन आशिल्ली. आतां चवथी पयलीं कॉरिडॉरचें काम पुराय करपाचे निर्देश कंत्राटदाराक दिल्यात. चवथी पयलीं कॉरिडॉराचें उक्तावण जातलें, अशी घोशणा भौशीक बांदकाम खात्याचे मंत्री दिगंबर कामत हांणी केली. विधानसभा वेंचणुकेची आचारसंहिता लागू जावचे पयलीं इलिवेटेड कॉरिडॉरचें उक्तावण जातलें.
कर्मचारी भरती आयोगा वतीन नोकर भरतीच्या जायरातीं सयत परिक्षा घेवपाची प्रक्रिया चालू आसा. हे भायर रोजगार मेळाव्यांचें लेगीत आयोजन चालू जालां. येत्या म्हयन्यांत सरकारी नोकऱ्यां सयत खासगी वाठारांत लेगीत चडांत चड नोकर भरती करपाचे यत्न आसात.
बुधवारा येरादारी संचालनालयाच्या नव्या कार्यालयाचे पर्वरे उक्तावण जालें. दिवचल बसस्टॅण्डाचें काम पुराय जावंक नासलें तरी उक्तावणाच्यो हालचाली सुरू जाल्यात. प्रकल्पांचीं कामां पुराय करून जाता तितले बेगीन उक्तावण करपाच्यो हालचाली चालू जाल्यात. फोंडें पोटवेंचणूक रद्द जाल्ल्यान फोंडें मतदारसंघाक सध्या आमदार ना. जिल्हो पंचायत वेंचणुकेंत पक्षाक धडेर येस मेळ्ळें. गोंयांतले विरोधी पक्ष लेगीत विस्कळीत आसात. हाचो लाव घेवन मुजतपूर्व वेंचणूक घेवपाचो विचार पक्षीय पावंड्यार सुरू आसा. हाका लागून भारतीय जनता पक्षातर्फे आतां मेळावे तशेंच बसकांची धूम सुरू जातली.
मुख्यमंत्र्यान घेतली ज्योतिरादित्य सिंदिया हांची भेट
मुख्यमंत्री डॉ. प्रमोद सावंत हांणी केंद्रीय दळणवळण मंत्री ज्योतिरादित्य सिंदिया हांची भेट घेतली. गोंयांत भारत नेट प्रकल्पाचें काम बेगीन पुराय करचें. कनेक्टिविटी सुदारपा खातीर मुळाव्यो सुविधा उबारपाची मागणी मुख्यमंत्री डॉ. प्रमोद सावंत हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
