भांगरभूंय | प्रतिनिधी
पणजीः एआय भितर कोंकणीचो आसपाव जावचो हे खातीर कोंकणी लार्ज लेन्गवेज मोड्यूल (एलएलएम) तयार करपाक सुरवात केल्या. हे एलएलएमचे अंमलबजावणी खातीर आमी भाशे वांगडा समजातकायेची कबलात केल्या. कांय दिसांनी कोंकणींतल्यान एआयचो वापर सुरू जातलो, अशी म्हायती म्हायती आनी तंत्रगीन्यान मंत्री रोहन खंवटे हांणी दिली.
सद्या एआयन हेर भाशेंत मुखार आसत मात कोंकणीचे बाबतींत एआय अजून कच्चो आसा. चॅट जीपीटी, डिपसीक सारकिल्ले एआय कोंकणीचे कमांड घेनात. तशेंच इंग्लीशीचो कोंकणी अनुवाद मराठींत करून दितात आनी हातूंत चडश्या मराठी शब्दांचो आसपाव आसता. सद्या गुगल जेमीनीन एआयन कोंकणीचो मात्सो हात घट्ट धरला. जर कमांड सोडल्यार इंग्लीशीचो कोंकणींतल्यान अनुवाद ८० टक्के सारको आसता.
अमेरिकेंत रावपी गोंयकारान गुगला भितर कोंकणी भास तयार केली. मडगांव रावपी आनी गोंय आभियांत्रीक म्हाविद्यालयाचो आदलो विद्यार्थी संजीत हेगडे देसाय हांणी ही कामगरी केल्या. आतां आमी एक पावल फुडें वचून भाशीणी वांगडा समाजाकायेची कबलात करून आमी एक कोंकणी एलएलएम तयार करतात, अशें खंवटे हांणी सांगलें.
ह्या माध्यमातल्यान कोंकणी सगले शब्द जाग्यार पडटले आनी लोकांक एयआयचो वापर कोंकणीतल्यान करपाक शक्य जातलें. ह्यान फुडें मजकूर इंग्लीशींत घातले उपरांत ताचो स्पश्ट अणकार कोंकणींकतल्यान जातलो. ही एक बोली भास आसा ताका वेळ लागतलो आनी एका राती भितर हें जावपाक शकना. कांय दिसांनी कोंकणी आमका एआयचेर पळोवपाक मेळटली, अशी म्हायती खंवटे हांणी दिली.
तशेंच सरकारी सेवा कोंकणी आनी मराठी भाशेंत उपलब्ध आसतल्यो. ’चॅटबॉट्स’ आनी हेर एआय माध्यमां वरवीं नागरिकांक २४ वरां सरकारा कडेन संवाद साधपाक शकतले. पर्यटन, शेतकाम, भलायकी आनी शिक्षण ह्या मळांचेरूय एआय-चो उपेग जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
