गोंय सहकारी धोरणाक लागून सहकारी मळाक बळगें: सुभाष शिरोडकार

भांगरभूंय | प्रतिनिधी

पणजीः राज्य सरकारान केल्ल्या गोंय सहकारी धोरणाक लागून राज्यांतल्या सहकारी क्षेत्राक बळगें मेळटलें अशें मंत्री सुभाष शिरोडकार हांणी सांगलें. बिरेस्तारा पर्वरे जाल्ले कार्यावळींत ते उलयताले. हे विशीं खात्यान जीसीसीआय, जीपीएआरडी, जैव विविधताय मंडळा कडेन समाजीक समंजस्य करार केला. तशेंच सहकारी संस्थां खातीर ऑनलायन सेवा दिवपी ९ मॉड्यूलांचें उक्तावण केलें. ह्या वेळार नरेंद्र सावयकार, प्रतिमा धोंड, आशुतोष आपटे आनी हेर अधिकारी हाजीर आशिल्ले.
गोंयांत पयलेच फावट सहकारी धोरण हाडलां. केंद्र सरकाराच्या धोरणा प्रमाण हें धोरण आसा. पूण गोंयांतल्या सहकारी क्षेत्राच्या गरजे प्रमाण तातूंत बदल केल्यात. सहकारांतल्यान समृद्धी खातीर कृषी क्षेत्रा वांगडाच सहकारांतल्या हेर क्षेत्रांची उदरगत जावप गरजेचें. स्वयंपूर्ण गोंय, विकसित भारत करपा खातीर हें धोरण म्हत्वाची भुमिका करतलें. ह्या खात्याचो ताबो घेतले उपरांत राज्यांतल्या सहकार क्षेत्राक कांय आडमेळीं आयिल्ल्याचें जाणवल्लें.
खात्यांतल्यो जायत्यो गजाली आवटसोर्स जावपाक लागल्यो. हातूंत बदल करपाचें आमी थारायलें. आनी ते प्रमाण सहकारी क्षेत्रांत वेगवेगळीं धोरणां, येवजण्यो, नव्या तंत्रगिन्यानाची सुरवात जाली. सहकारी बँका क्रेडिट सोसायटी हांचें नॉन परफॉर्मिंग असेट (एनपीए) चड आशिल्ल्याचे आमकां समजलें. ते प्रमाण १ जानेवारी २०२५ सावन आमी रिणाची वसुली करपाची जापसालदारकी रीण मंजुरी दिवपी शाखेक तशेंच शाखा वेवस्थापकाक दिल्या. ताका लागून फाटल्या १५ म्हयन्यांत सहकारी संस्थांचे एनपीए उणे जाल्यात. सध्या १०५ खात्यांतली फकत ६५ लाख रुपया रक्कम एनपीए आसा.
नव्या धोरणा प्रमाण सहकार क्षेत्रांतल्या कर्मचार्‍यां खातीर प्रशिक्षण, संस्थांक अर्थीक मजत, डिजिटायझेशन, कागाळ निवारण प्राधिकरण, ऑनलायन सुविधा अशा विवीध शिफारशी केल्यात. भागधारकांचे सुचवणे प्रमाण धोरणांत गरजेेचे बदल करतले अशें धोरण मसुदो समितीचे अध्यक्ष नरेंद्र सावयकार हांणी सांगलें.

बेगीनूच घेतले निर्णय
खात्या खातीन तिरुमला तिरुपती सोसायटीचे अर्थीक स्थितीचा नियाळ घेतात. सोसायटीन कांय कागदपत्रां सादर केल्यांत. सोसायटीक परस परवानो दिवचो काय ना हे विशीं रोखडोच निर्णय घेतले अशें सुभाष शिरोडकार हांणी स्पश्ट केलें.