भांगरभूंय | प्रतिनिधी
म्हापशें : अर्थसंकल्पीय अधिवेशना वेळार विधानसभेच्या प्रेक्षक गॅलरींतल्यान मिराबागच्या प्रस्तावीत बंधार्याक विरोध करपी आंदोलकांनी तकटे दाखोवन घोशाणा करीत सरकाराचो निशेध केल्लो. ह्या प्रकरणांत पर्वरे पुलिसांनी आदले मंत्री दीपक पाऊसकार हांचे सयत पांचूय दुबावीत आरोपीं आड ३०० पानी आरोपपत्र दाखल केलें.
बिरेस्तार ३० एप्रिलाक सकाळीं म्हापशें पयली श्रेणी न्यायालयांत २१ साक्षीदारांच्या साक्षी सयत ३०० पानांचें आरोपपत्र सादर केलें. आदले मंत्री दीपक पाऊसकार हांचे वांगडाच मिराबागच्या आपा नायक, उपेंद्र नायक, उमेश नायक आनी हेमंत भंडारी हांचो ह्या दुबावीतां मदीं आसपाव आसा.
मजगतीं, ही घडणूक ६ मार्च २०२६ तारखेर सकाळच्या ११.३० वरांचेर घडिल्ली. अर्थसंकल्पीय अधिवेशन सुरू जातकच विधानसभेच्या प्रेक्षक गॅलरींत हाजीर आशिल्ल्या वयल्या चार दुबावितांनी ‘आमका नाका बांध’ अशें बरयल्ले तकटे दाखोवन सरकारा आड घोशणा केल्ली. उपरांत चारूय दुबावितांक विधानसभा सुरक्षा कर्मचार्यांनी गॅलरींतल्यान भायर काडून ताब्यांत घेतले.त्याच दिसा आपा नायक, उपेंद्र नायक, उमेश नायक आनी हेमंत भंडारी ह्या चार जाणांक १४४ कलम मोडिल्ल्या आरोपा खाला प्रतिबंधात्मक कारवाये खाला पुलिसांनी अटक केल्ली.
दुसर्या दिसा ७ मार्चाक ह्या दुबावितांक बार्देस उपविभागीय दंडाधिकार्यां मुखार पुलिसांनी हाजीर केले. तेन्ना चालू विधानसभा अधिवेशन काळांत विधानसभा तशेंच पर्वरी वाठारांत प्रवेशाक मनाय केल्ल्याचे अटी सयत दरेकी २० हजार रूपया वयक्तीक हमी रक्कमेच्या आधारार दुबावितांची सुटका केली.
७ मार्चाक गोंय विधानसभा सचीव नम्रता उल्मान हांचे कागाळीचेर पुलिसांनी वयल्या दुबावितां आड गुन्यांव नोंद केल्लो. विधानसभेचे वांगडी आशिल्ले मंत्री आनी आमदार सोडल्यार कायद्या प्रमाण हेरांक विधानसभा सभाघरांत उलोवपाक वा तकटे दाखोवंक मेळनात. मात वयल्या दुबावितांनी तकटे दाखोवन आनी घोशणा दिवन कायदो मोडपाचो गुन्यांव केला. देखून हे कागाळींत संबंदीत व्यक्तीं आड गुन्यांवकारी खटलो नोंद करचो, अशी मागणी हे कागाळींत केल्ली.
ते प्रमाण पर्वरी पुलिसांनी वयल्या चारूय दुबावितां आड भारतीय न्याय संहितेच्या ६१(२), ३२९(३), २२१(१) १३२ आनी ३५३(१) कलमा खाला गुन्यांव दाखल केल्लो. तशेंच दुबावितांक कायदेशीर नोटीस धाडून दुबावितांची पुलिसांनी चवकशी केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
