भांगरभूंय | प्रतिनिधी
पणजी : गोंयचे नदरेन सामको म्हत्वाचो आनी बरीच वाट पळोवपाक लावपी असो पर्वरी इलिव्हेटेड कॉरिडोअराचें काम सध्या निमाण्या टप्प्यांत आयलां. नियोजीत मुजती पयलींच म्हळ्यार चवथी पयलींच ह्या कॉरिडोअरचें उक्तावण करतले, अशी म्हत्वाची घोशणा पीडब्ल्यूडी मंत्री दिगंबर कामत हांणी दिली.
ह्या निर्णयाक लागून हांगच्यान कामा निमतान प्रवास करपी कामगार वर्गाक आनी पर्यटकांक व्हड सुशेग मेळटलो. येवपी चवथीक गणपतीक येवकार आनी विसर्जनूय ह्या नव्या इलिव्हेटेड मार्गावेल्यान जातलें, अशीय म्हायती तांणी दिली.
आयज हॉट मिक्सिंग कामाचें उक्तावण जालें. ह्या वेळार पर्वरीचे आमदार रोहन खंवटे, साळगांवचे आमदार केदार नायक तशेंच प्रकल्पा कडेन संबंदीत कंत्राटदार आनी अभियंते हाजीर आशिल्ले.
पर्वरे हो भाग पणजी आनी उत्तर गोंयांक जोडपी मुखेल महामार्ग आशिल्ल्यान हांगा सदांच येरादारी कोयंडीक तोंड दिवचें पडटा. पर्वरी जंक्शनावेल्या वाडपी वाहनांच्या आंकड्याक लागून जावपी कोयंडी टाळपा खातीर हो इलिव्हेटेड कॉरिडोअर उभारतात. आतां हो प्रकल्प वेळा पयलींच पुराय जाल्ल्यान ह्या मार्गावेली येरादारी पुरायेन सुरळीत जातली. प्रवाशांचो वेळ वाचतलो आनी प्रवासूय बरे तरेन जातलो.
बांदकाम मंत्री दिगंबर कामत हांणी ह्या प्रकल्पाच्या कामाचो सविस्तर नियाळ घेतले उपरांत तांणी ही घोशणा केली. कामाचे गुणवत्ते कडेन कसलेच तरेची तडजोड करिनासतना वेळार काम पुराय करपा खातीर संबंदीत अधिकार्यांक आनी कंत्राटदाराक खर सुचवण्यो दिल्यो.
गोंयांत चवथीच्या काळांत रस्त्यार भाविकांची आनी वाहनांची व्हड कोयंडी आसता. अशा वेळार पर्वरी इलिव्हेटेड कॉरिडोअर सुरू जाल्यार ही कोयंडी टाळपाक व्हड मजत जातली. थळावे नागरीक आनी भावीक ह्या नव्या पुला वेल्यान बाप्पाक येवकार आनी विसर्जन उमेदीन आनी वेळार करपाक शकतले. थळाव्यांनी आनी प्रवाशांनी हे घोशणेक येवकार दिला. हो प्रकल्प पुराय जाले उपरांत गोंयच्या मुळाव्या सुविधांनी आनीक एका म्हत्वाच्या घटकाची भर पडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
