भांगरभूंय | प्रतिनिधी
पणजी : दोनापावल आनी म्हापशेंच्या बंगल्यांचेर सशस्त्र दरोडे घालून लाखांनी रुपया चोरिल्ल्या बांगलादेशी टोळयेच्या पांच दुबावितांक गोंय पुलिसांनी बिरेस्तारा सकाळीं मडगांव रेल्वे स्टेशनाचेर हाडले. फाटल्या कितल्याशाच म्हयन्यां सावन गोंयांत ‘मोस्ट वॉन्टेड’ आशिल्ले हे टोळयेचो दिल्ली पुलिसांनी १५ दिसां पयलींच एके भिरांकूळ फारपेटी उपरांत धरले. हे टोळयेन गोंयां सयत कर्नाटक, दिल्ली आनी केरळ सारकिल्ल्या राज्यांनीय धुमाकूळ घाल्लो.
दिल्ली पुलिसांनी १४ आनी १५ एप्रिलाक ही व्हडली कारवाय मध्यानरातीं केल्ली. दिल्लीच्या सराय काले खान मसंडभूंये लागसारच्या रानांत नवे लुटमाराची तयारी चलिल्ल्याची म्हायती पुलिसांक मेळ्ळी. ह्या वाठाराक घेराव घालो तेन्ना ह्या सशस्त्र लुटमार्यांनी तांचेर फारपेट केलो. पुलिसांनीय प्रतिकार करून स दरोडेखोरांक धरले, पूण काळखाचो फायदो घेवन दोग दुबावीत पळून वचपांत येसस्वी जाले.
गुन्यांव फांट्याचे निरीक्षक दत्तगुरु सावंत आनी निरीक्षक किशोर रामानंद हांच्या फुडारपणा खाला २२ जाणांच्या पंगडान ह्या दुबावितांक ट्रान्स्फर वॉरंटाचेर दिल्लींत ताब्यांत घेतले. बिरेस्तारा गोंयांत हाडिल्ल्या दुबावितां मदीं नूर आलम उर्फ आदिम खान, मो. सैफूल इस्लाम, सोहेल खान, जाकिर हवलादार आनी मो. सुमन हवलादार उर्फ पप्पू हांचो आसपाव आसा. सव्या दुबाविताचेर दिल्लीक एक वेगळो खटलो सुरू आशिल्ल्यान कायदेशीर कारवाय पुराय जाले उपरांत ताका गोंयांत हाडटले.
हे टोळयेची दरोडो घालपाची पद्धत सामकी क्रुर आनी शिस्तबद्ध आशिल्ली. बांगलादेशांतल्या बागेरहाट जिल्ह्यांत रावपी हे सगले जाण बेकायदेशीरपणान भारतांत प्रवेश करताले. शारा पसून पयस रावपी गिरेस्त आनी विशेश म्हणल्यार ज्येश्ठ नागरिकांक ते लक्ष करताले. दरोड्या मजगतीं प्रतिकार केल्यार तांचो खून करपाकूय ही टोळी फाटीं-फुडें पळयनाशिल्ली. दरोडो घाले उपरांत हे गुन्यांवकार सरळ बांगलादेशांत वचून लिपून रावताले.
गोंयांत हे टोळयेन दोन व्हडले दरोडे घाल्ले. २० एप्रिल २०२५ दिसा दोनापावलाच्या एका बंगल्यांत घुसून घर धनयाक बाथरूमां घालून तांणी एक किल भांगर आनी ३ लाख रुपया लुटिल्ले. उपरांत ७ ऑक्टोबर २०२५ दिसा म्हापशें हावजींग बोर्ड वाठारांत ३५ लाखांची लूट करून कागाळदाराची गाडी घेवन तांणी थंयच्यान पळ काडिल्लो. तशेंच फोंडेंच्या चोरयेच्या प्रकरणांतूय तांचो वाटो आशिल्ल्याचें उक्तें जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
