भांगरभूंय | प्रतिनिधी
24 वरां भितर सरपंचा वयल्या अविस्वासाची चर्चा; जीत आरोलकार थारले वरचड
भांगरभूंय । प्रतिनिधी
पणजीः सरपंच, उपसरपंचपदाचे निवडी उपरांत फक्त 24 वरां भितर सरपंचाचेर अविस्वास थाराव दाखल जाल्ल्यान पेडणें म्हालांतल्या मांद्रें पंचायतीची चर्चा गोंयभर सुरू आसा. ह्या 24 वरांत मांद्र्यां घडिल्लें राजकी नाटक आमच्या प्रतिनिधीच्या हाताक लागलां. हे घडणुकेंतल्यान फक्त विधानसभाच न्हय जाल्यार पंचायतींनी वेंचून आयिल्ले उमेदवार केन्ना बोटा वयली थुंकी बदलीत ताचो नेम ना हेंच स्पश्ट जालां.
पेडणें मतदारसंघांतली मांद्रे ही सगळ्यांत व्हड 11 वांगड्यांची पंचायत. ताका लागून दरेके वेंचणुकेंत पुराय म्हालाचें हे पंचायती कडेन लक्ष आसता. अंदूं पंचायत वेंचणुकेंत भाजपाचे आदले आमदार दयानंद सोपटे आनी मगोचे सध्याचे आमदार जीत आरोलकार ह्या दोनूय मातब्बर फुडाऱ्यांनी वेंचणुकेंत आपापलीं पॅनलां उबीं केल्लीं. आदले मुख्यमंत्री लक्ष्मीकांत पार्सेकार हांणी हातूंत गसलोच रस दाखोवंक ना, पूण मांद्रेंच्या कांय नागरिकांनी आपलें ‘स्वराज’ नांवाचें पॅनल वेंचणुकेंत उबें केल्लें. मांद्रें मतदारसंघांतले काँग्रेसीचे फुडारी अॅड. अमीत सावंत हांणी स्वताचे हिकमतीचेर वेंचणूक लडयिल्ली. ताका हारोवपा खातीर आमदार जीत आरोलकार हांणी अॅड. सावंत हांच्या प्रभागांत आपलो उमेदवार दिल्लो. ते भायर जीत आरोलकार आनी ताचे घरकान्नीन त्या प्रभागांत नेटान प्रचार लेगीत केल्लो. तरी लेगीत ह्या प्रभागांत आरोलकाराच्या उमेदवाराक हारोवन अॅड. सावंत हांणी सगळ्यांत चड मतां घेवन जैत मेळयलें. जैत मेळ्ळे उपरांत अॅड. सावंत हांणी उक्तेपणी आमदार आरोलकार हांचे आड विधान केल्लें.
वेंचणणुकेचो निकाल येताच आमदार आरोलकार हांणी आपलें पॅनल जिखिल्ल्याचो दावो करून किरण सावंत हांकां सरपंच म्हूण जाहीर केलें. किरण सावंत हे आमदार आरोलकार हांचे कार्यकर्ते आसले तरीय अॅड. सावंत हांचे घट्ट इश्ट. ताका लागून आपल्याक एकलो उडोवन आमदार आरोलकार हांणी किरण सावंत हाका वांगडा घेवन तयार केल्ल्या पॅनलाक धपको दिवपाची चाल अॅड. सावंत हांणी आंखली. आदले आमदार सोपटे हांकां लेगीत आमदार आरोलकार हांची चाल मोडून उडोवपाची आयती संद मेळ्ळी. ते प्रमाण अॅड. सावंत हांणी फुडाकार घेवन आमदार आरोलकार हांच्या पॅनलांतल्या किरण सावंत आनी हेरांक आपले वटेन वळोवन तशेंच सोपटे समर्थक गटाक घेवन दिल्ली पावले. ह्या गटान दोन दीस थंय राबितो केलो. नव्या पॅनलाचें सरपंचपद निवडीचे अधिकार दयानंद सोपटे हांकां दिले. आमदार आरोलकार हांच्या गटांतल्यान फोडून हाडिल्ले किरण सावंत हाकाच दयानंद सोपटे सरपंच करतले अशी अॅड. सावंत हांकां आस्त आशिल्ली. पूण संख्याबळ वाडटाच सोपटे हांणी राजकी गणीत बदलून महेश कोनाडकार हांकां सरपंच आनी चेतना पेडणेंकार हांकां उपसरपंच केली.
हे घडामोडी उपरांत सोपटे हांच्या निर्णयाक लागून अॅड. सावंत खूब निरशेल्ले. सरपंच जाहीर जावन लेगीत फक्त आमदार आरोलकार हांकां आपली ताकद दाखोवपा खातीर अॅड. सावंत हांणी किरण सावंत हांकां आपले वटेन वळयले, पूण तांची सरपंच जावपाची संद गेल्ल्यान ते बेजार जाले. सोपटे हांकां सरपंच निवडीचें दिल्लें उतर आपूण पाळ्ळें आनी महेश कोनाडकार हांची निवड लेगीत जाली. पूम सोपटे हांचो हो निर्णय चुकीचो आशिल्लो हें दाखोवन दिवचे खातीर अमीत सावंत हांणी परतून एकदां सोपटे समर्थक गटांतल्या पंचांक आपले वटेन वळयले आनी थेट आमदार आरोलकार हांच्या गटांत व्हेले. आमदार आरोलकार हांणी अॅड. अमीत सावंत हांचे कडेन दिलगिरी उक्तावन तांच्या गटाक तेंको दिवपाची विनवणी केले उपरांत हो गट थेट रेडी गेलो आनी थंय गणेशाच्या आशिर्वादान जीत आरोलकार हांच्या पॅनलाची घोशणा केली. रोखड्या रोखडो सरपंच महेश कोनाडकार हांचे आड अविस्वास थाराव दाखल करून गट विकास अधिकाऱ्या वतीन 29 ऑगस्टाक अविस्वास थारावा वयले बसकेची नोटीस लेगीत काडून घेतली.
मजगतीं, हे सगळे घडामोडींत भाजप, मगो सर्ती भायर रावून लेगीत व्हड मतांच्या फरकान जिथून आयिल्ले अॅड. अमीत सावंत हांणी सगळ्यांचें लक्ष आपल्याचेर केंद्रीत केलां.
अॅड. अमीत सावंत हे काँग्रेसीचे फुडारी आसले तरी लेगीत तांणी मुख्यमंत्री डॉ. प्रमोद सावंत आनी भाजपा प्रदेशाध्यक्ष सदानंद तानावडे हांची भेट घेतिल्ल्यान मांद्र्यां चर्चांक ओतो आयिल्लो. अखेर अॅड. सावंत हांणी आपली राजकी ताकद सिद्ध करून आपले मर्जी प्रमाण राजकी नाटक खेळयलें. हे राजकी घडामोडींत आतां सरपंचपदाची माळ ही अॅड. अमीत सावंत हांच्या गळ्यांत पडटली, अशी नेटाची चर्चा सुरू जाल्या. किरण सावंत हांणी लेगीत अॅड. अमीत सावंत हांचे निवडीक पाचवो बावटो दाखयला, अशी म्हायती सुत्रांनी दिल्या.
उपसरपंच चेतना पेडणेंकार हांकांय ऑफर
आमदार जीत आरोलकार हांच्या गटान सरपंच कोनाडकार हाचे आड अविस्वास थाराव दाखल केलो, पूण उपसरपंच चेतना पेडणेंकार हांचे आड मात अविस्वास हाडूंक ना. तांकां उपसरपंचपदाचेर कायम दवरतले, पूण तांणी आमदार आरोलकार हांच्या गटाक तेंको दिवचो, अशी ऑफर लेगीत तांकां दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
