भांगरभूंय | प्रतिनिधी
मुख्यमंत्री डॉ. प्रमोद सावंत हांचो लोकप्रतिनिधींक उलो
सॅनिटरी पॅड, चिकन कोयर विनाशुल्क उखलतलें सरकार
कोयर कंत्राटदाराच्या कामाचेर जीपीएस ट्रॅकिंगा वरवीं देखरेख
भांगरभूंय । प्रतिनिधी
पणजी : पंच, सरपंच ह्या लोकप्रतिनिधींनी फक्तगटार, पेव्हर्स ब्लॉक बांदप अशीं कामां करचीं न्हय. तांणी लोकांक फायद्याची थारतलीं, पंचायती स्वयंपूर्ण जातल्यो, अशीं कामां करचीं. गांवांत एकादें सभाघर बांदून ते भाड्यान दिल्यार लेगीत पंचायतीक महसूल मेळपाक शकता, अशें मुख्यमंत्री डॉ. प्रमोद सावंत हांणी सांगलें. पंचायतींतल्या सॅनटरी पॅड, प्रोढ आनी ल्हान भुरग्यांच्या डायपर तशेंच चिकन आनी मटणाचो कोयर बेगिनूच सरकारा वतीन उखलतले. ते खातीर कसलेंच शुल्क घेवचे नात, अशेंय तांणी सांगलें. बुधवारा पणजे पंचायतराज दिसा निमतान आयोजीत केल्ले कार्यावळींत ते उलयताले. ह्या वेळार मंत्री मॉवीन गुदिन्हो, संचालक महादेव आरोंदेकार, घनकोयर वेवस्थापनाचे वेवस्थापकीय संचालक हरीश हडकोणकार, रेश्मा बांदोडकार, सिद्धार्थ गांवस देसाय आनी हेर अधिकारी उपस्थीत आशिल्ले.
मुख्यमंत्र्यान सांगलें, सध्या गांवागांवांनी सॅनिटरी पॅड, डायपर अश्या कोयराचो विलो लावप कठीण जालां. पंचायतींनी असो कोयर वेगळो काडून दवरचो. दर दोन दिसांनी फोंडेंच्या जैव वैजकी कोयर प्रकल्प चलोवपी एजन्सी वरवीं हो कोयर एकठांय करतले. तशेंच चिकन, मटण गाडयां वरीं करतात तो कोयर पोस्ट्री संघटणे वतीन एकठांय करतले. कोयर वेवस्थापना खातीर पंचायतींक विशेश निधी दिवपाचो आमचो विचार चालू आसा. मात हे खातीर पंचायतींनी कोयर कर घेवप गरजेचें आसा. सरकार कोयर वेवस्थापना खातीर वर्साक 500 कोटीं परस चड खर्च करता. कोयर कंत्राटदाराच्या कामाचेर देखरेख दवरचे खातीर जीपीएस ट्रॅकींग सुरू जालां. ते कातीर ताणें कितलो कोयर उखल्ला आनी ताचो विलो कसो लायला, हाची म्हायती मेळटा.
दरेके पंचायती खातीर तंत्रीक सहाय्यक
पंचायत खात्या वतीन मे म्हयन्या उपरांत दरेका पंचायतींत एक तंत्रीक सहाय्यक नेमतले. सगल्या पंचायतींनी एआय आदारीत अटेंडन्स प्रणाली आनी हेर तंत्रज्ञानाचो वापर सुरू करचो, असो उलो मंत्री मॉवीन गुदिन्हो हांणी मारलो.
‘हेल्थ वीथ आयुर्वेद’ मोहिमेंत बदल
‘हेल्थ वीथ आयुर्वेद’ हे मोहिमे प्रमाण दरेका मतदारसंघांत भलायकी शिबिरां आयोजीत करपाचीं आशिल्लीं. मात वाडट्या उबाळ्याक लागून अशीं शिबिरां घेवपाक मेळचीं नात. ते बदला मुळावें भलायकी केंद्र, खाजगी आयुर्वेदीक हॉस्पिटलांनी ही मोहीम 2 ते 31 मे ह्या काळांत चालीक लायतले. उपचाराचो सगलो खर्च सरकारा वतीन दितले, अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
