भांगरभूंय | प्रतिनिधी
आयटी मंत्री रोहन खंवटे हांची म्हायती
पणजीः संबंदीत भागीदारकांचो सल्लो घेवन १६ वर्सां पिराये सकयल्या भुरग्यां खातीर सोशल मिडियाचेर निर्बंध घालपा विशींचो दस्तावेज तयार केला. मुख्यमंत्री डॉ. प्रमोद सावंत हांच्या वांगडा चर्चा केले उपरांत हो दस्तावेज कैंद्रीय आयटी मंत्री अश्विनी वैष्णव हांकां मान्यताये खातीर धाडटले, अशी म्हायती आयटी मंत्री रोहन खंवटे हांणी दिली.
एआय धोरण आनी सोशल मिडीया निर्बंधा विशीं आपयल्ले भागधारकांचे बसके उपरांतची म्हायती दितना मंत्री खंवटे उलयताले. ह्या वेळार आयटी खात्याचे संचालक कबीर शिरगांवकार, गोवा इलेक्ट्रोनिक्स लिमेटेडीची सीईओ रेवती कुमार तशेच शिक्षण संस्था, उद्देग क्षेत्रातले प्रतिनिधी हजर आशिल्ले.
भागधारकांनी दिल्ले सुचवणे प्रमाण सोशल मिडीया टूल्स जशे, फेसबूक, इन्स्टाग्राम हांची सद्या भुरग्यांक गरज ना. पूण हे बदला शिक्षणीक टूल्स जशे गुगल, एआय हाचो वापर करून हो वेळ चड गजाली शिकपाचेर भर दिवन आमच्या भुरग्यांक देशाच्या फुडारा खातीर तयार करपाचेर भर दिल्या, अशें खंवटे हांणी सांगलें.
आमी हो विशय देशांत पयलीं घेतिल्लोे आनी आतां ही चर्चा दरेका राज्यांनी सुरू जाल्या. आयटी कायद्याच्या आदाराचेर आमी केंद्रीय आयटी मंत्री आश्विनी वैष्णव हांचेकडेन कांय सुदारणा करपाची मागणी करतले जी सगळ्या राज्यांच्या हिता खातीर थारतली. आमचे तरणाटे तंत्रगीन्याच्या बगळ्यार तयार जाल्यारूच राज्य आनी देशा खातीर फायद्याचे थारतले.
पालक शिक्षक संघ, महाविद्यालय प्रतिनिधीच्यो सुचोवण्यो घेवन सद्या स्थिती कितें आसा आनी फुडाराक कितें करपाक सोदता हे सगले मुद्दे आमी पत्रात मांडल्यात. हो विशय दरेक मनश्याक आव्हान थारिल्ल्यान केंद्र सरकार आनी हेर राज्यां होच विचार मांडटले अशी म्हाका पुराय खात्री आसा, अशी आस्त खंवटे हांणी उक्तायली.
भुरग्यांक कसलो मोबायल घेवन दिवप वा मोबायल दितकत तांचे वापरा खातीर भुरग्यांचेर नियंत्रण दवरप हें पालकां खातीर आव्हान आसा. देखून राज्यां वतीन हें विशिश्ट अशें धोरण पालकांक थाकाय दितलें. जेन्ना भुरगो १९ वर्सां पिराय पुराय करून फुडें वयतलो तेन्ना आपलीं फाटलीं पांच वर्सा गेमी खेळून वगडायलीं नात हाचो ताका कसलोच पश्चाताप जावचो ना, असो विश्वास खंवटे हांणी उक्तायलो.
राज्य सरकार आपलो ’एआय’ धोरणाचो मसुदो ४ मे दिसा जाहीर करतले. हो मसुदो फुडल्या १५ दिसां खातीर संकेतथळाचेर लोकां खातीर उपलब्ध आसतलो. नागरीक, विद्यार्थी, उद्येजक आनी तज्ञांनी हाचेर आपल्यो सुचोवण्यो आनी सल्लो दिवचो, असो उलो म्हायती तंत्रज्ञान मंत्री रोहन खंवटे हांणी मारला. हें धोरण येवपी १०० दिसां भितर पुरायपणान लागू जातलें.
सरकारी सेवा कोंकणी आनी मराठी भाशेंत उपलब्ध आसतल्यो. ’चॅटबॉट्स’ आनी हेर एआय माध्यमां वरवीं नागरीक २४ वरां सरकारा कडेन संवाद सादपाक शकतले. पर्यटन, शेतकाम, भलायकी आनी शिक्षण ह्या मळांचेरय एआय-चो उपेग जातलो. ’डीपफेक’ वा सोशल मिडिया वयल्या वायट मजकुराक लागून नागरिकांचे जिणेचेर परिणाम जाल्यार सरकार कडक पावलां उखलतलें. बायलांची सुरक्षा ही सरकारा खातीर ’नॉन-नेगोशिएबल’ न्हय. आमी ते बाबतींत कसलीच तडजोड करचे नात, अशें मंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
