भांगरभूंय | प्रतिनिधी
पणजी : फोंड्यां बुधवार, २९ एप्रिलाक सकाळीं घडिल्ले एके घडणुकेक लागून बरोच बोवाळ जाला. कवळेंच्या नामनेच्या देव श्रीकपिलेश्वर देवळा सामकार आशिल्ले तळयेंत एके तरणाटेची कूड मेळ्ळ्या. सेजल प्रशांत तिळवे (२१, रा. ढवळी-फोंडें) अशें मरण आयिल्ले तरणाटेचें नांव. ती कायद्याचें शिक्षण घेतालेी.
हे विशीं मेळिल्ले चड म्हायती प्रमाण, सेजल कायदो महाविद्यालयांतलें पयल्या वर्साचें विद्यार्थी आशिल्लें. बुधवारा सकाळीं तें कोणाक कितेंच सांगिनासतना घरांतल्यान भायर सरलें. धूव घरांत नाशिल्ल्याचें समजतांच तिच्या कुटुंबान आनी इश्टांनी ताका सोदपाक सुरवात केली.
हे मजगतीं, कपिलेश्वरी देवळा सामकारचे तळयेंत कोणें तरी उडी मारिल्ल्याची खबर सगल्याक पातळ्ळी. हेच म्हायतीच्या आदारार तिच्या घरच्यांनी आनी थळाव्यांनी तळये कडेन धांव घेतली. रोखडीच फोंडें उजो पालोवपी दळाक आनी आपत्कालीन सेवा दळाकूय म्हायती दिली. दळाचे जवान रोखडेच घडणुके सुवातेर पावून तांणी तळयेंत उडी मारिल्ल्या मनशाचो सोद घेवपाक सुरवात केली. कांय वेळान दळाच्या जवानांक तळ्यांतल्यान एक कूड भायर काडपाक येस आयलें. ती कूड सेजलचीच आशिल्ल्याचें उक्तें जालें. सेजलाच्या मरणान ह्या वाठारांत दुख्ख पातळ्ळां.
फोंडें पुलिसांनी घडणुके सुवातेचो पंचनामो करून सेजलाची कूड पोस्टमार्टमा खातीर धाडल्या.
सेजलान हें पावल कित्याक उखल्लें? काय हो एक अपघात? हे विशीं चवकशी चालू आसा. सध्या तिच्या मोबायलाचे कॉल रेकॉर्ड्स आनी हालींचे वागणुकेचो पुलीस तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
