भांगरभूंय | प्रतिनिधी
पणजीः उच्च शिक्षण संचालनालयान वर्स २०२६-२०२८ खातीर बी.एड. अभ्यासक्रमा खातीर प्रवेश उक्ते केल्यात. राज्यांतल्या तीन शिक्षण महाविद्यालयांनी प्रवेश मेळोवपा खातीर सामान्य ऑनलायन प्रवेश प्रक्रिया जातली, अशी कळोवणी उच्च शिक्षण संचालनालय जारी केल्या.
शिक्षणीक वर्स २०२६-२०२८ खातीर निर्मला शिक्षण संस्था, पणजी, जीव्हीएम कॉलेज ऑफ एज्युकेशन फोंडें आनी पीईएस कॉलेज ऑफ एज्युकेशन, हांगा बी.एड. अभ्यासक्रमा खातीर सामान्य ऑनलायन प्रवेश प्रक्रिया जाहीर केल्या. नमूद केल्ल्या सगल्या संस्थांनी सामान्य प्रवेश प्रक्रिये खातीर समन्वय केंद्रां आसतलीं.
सामान्य बी.एड. प्रोस्पेक्टसाची सॉफ्ट कॉपी डीएचईचे उच्च शिक्षण संचालनालयाचे वॅबसायटीचेर मुफत उपलब्ध आसात. गोंय विद्यापिठा वतीन मार्च २०२६त घेतिल्ले ’जीयू-एआरटी’ परिक्षेंत वैध रँक मेळिल्ले इत्सूक उमेदवार प्रवेशा खातीर संचालनालयाचे वॅबसायटीचेर ऑनलायन अर्ज करपाक शकतात.
प्रवेश पोर्टल ३० एप्रील २०२६ दिसा सकाळीं ११.०० वरां सावन ११ मे २०२६ मेरेन चालू आसतले. अर्जदारांनी प्रोस्पेक्ट्सांत नमूद केल्ले प्रमाण गरजेचीं आशिल्लीं तशेंच वैध कागदपत्रां अपलोड करचीं. गुणवत्ता वळेरी आनी समुपदेशनाच्या तारखांच्या घोशणां खातीर अर्जदारांनी डीएचईचे वॅबसायटीक भेट दिवची.
प्रवेश प्रक्रिये कडेन संबंदीत कितेंय दुबाव आसल्यार ०८३२- २४१५५८५ वा २४१०८२४ ह्या हॅल्पलायन नंबराचेर संपर्क करचो. उमेदवारांक विनंती आसा की, तांणी अर्ज फॉर्मची हार्ड कॉपी जमा करपा खातीर कचेरेंत येवचें न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
