भांगरभूंय | प्रतिनिधी
मुख्यमंत्री डॉ. प्रमोद सावंत हांचे दोनूय जिल्होधिकाऱ्यांक निर्देश
भांगरभूंय । प्रतिनिधी
पणजीः गोंयांतल्या साबार वाठारांनी घरांचेर तशेंच हेर कडेन अजून लेगीत हुबोवन दवरिल्ले तिरंगो झेंडो ताकतिकेन देंवोवपाचे निर्देश दोनूय जिल्होधिकाऱ्यांक दिल्यात, अशें मुख्यमंत्री डॉ. प्रमोद सावंत हांणी बुधवारा पत्रकारां कडेन उलयतना सांगलें.
भारतीय स्वातंत्र्याच्या अमृत महोत्सवी वर्सां निमतान 13 ते 15गस्ट ह्या काळांत केंद्र सरकारान देशभरांत ‘हर घर तिरंगा’ मोहीम चालीक लायिल्ली. हे मोहिमे खाला तीन दीस घरांचेर तिरंगो हुबोवन अमृत महोत्सव मनोवपाचो निर्णय सरकारान घेतिल्लो. 15 ऑगस्टाक तिरंगो देंवोवपाची सुचोवणीय केल्ली, पूण अजून कांय घरांचेर तशेंच भौशीक सुवातांचेर हुबयिल्लो तिरंगो देंवोवंक ना. ताका लागून अशे तिरंगे ताकतिकेन देंवोवपाचे निर्देश आपणे दोनूय जिल्होधिकाऱ्यांक दिल्यात. कांय वाठारांनी ही मोहीम सुरू लेगीत केल्या, अशेंय मुख्यमंत्री डॉ. सावंत हांणी सांगलें.
मजगतीं, राजधानी पणजी सयत विवीध वाठारांनी कांय घरांचेर अजून लेगीत तिरंगे हुबयिल्ले स्थितींत आसात. कांय कडेन हुबयिल्ले तिरंगे बागावल्ले स्थितींत दिसतात. अशा प्रकारांक लागून भारताची शान आशिल्ल्या तिरंग्याचो अपमान जावपाक शकता. ताकाच लागून हे तिरंगे देंवोवपाचे निर्देश सरकारान जिल्होधिकाऱ्यांक दिल्यात, अशें सुत्रांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
