भांगरभूंय | प्रतिनिधी
पणजी : सेंट फ्रान्सिस झेवियर हांचे विशीं आक्षेपार्ह विधान केल्ल्या प्रकरणांत अटक केल्ले दुबावीत माधव खट्टराच्या जामीन अर्जाचेर आयज वास्को पयलो वर्ग न्यायालयांत म्हत्वाची सुनावणी जाली. दोनूय वटेनचो युक्तिवाद आयकून घेतले उपरांत न्यायालयान आपलो निकाल राखून दवरला. तो आयज मंगळारा सांजेवेळार वा फाल्यां बुधवारा सकाळीं जाहीर करपाची शक्यताय आसा. मजगतीं, ह्या प्रकरणांत दुबावीत माधव खट्टर हाचो भाशणा कडेन सरळ संबंद नाशिल्ल्याचें पुलीस तपासांत मुखार आयिल्ल्यान माधव खट्टर हांकां सुशेग मेळ्ळा.
हें पुराय प्रकरण १८ एप्रिलाक वास्को हांगा जाल्ले एके कार्यावळींतल्यान सुरू जालें. हे कार्यावळींत गौतम खट्टर हांणी सेंट फ्रान्सिस झेवियर हांचे आड वादग्रस्त विधान केल्लें. उपरांत पुराय गोंयांत बोवाळ जालो. क्रिस्तांव भावांनी ह्या विधानाचो निशेध करून पुलिसां कडेन कारवायेची मागणी केल्ली. उपरांत गोंय पुलिसांच्या गुन्यांव फांट्यान वेगान तपास करून गौतमाचो भाव माधव खट्टराक हिमाचल प्रदेशांतल्या कुल्लूच्यान ताब्यांत घेवन गोंयांत हाडलो. गौतमाचें भाशण माधव हांणीच बरयिल्ल्याचें सांगून ताका अटक केल्ली. गौतमाची गोंयांतली सगली वेवस्था माधवानूच केल्ल्याचें पुलिसांनी जाहीर केल्लें. ताका बिरेस्ताराच न्यायालयांच हाजीर केल्लो. थंय ताका चार दिसांची पुलीस बंदखण आयकयली. चार दिसांची पुलीस बंदखण सोंपले उपरांत सध्या १४ दिसांची न्यायालयीन बंदखण ताका आयकयल्या.
आयज जाल्ले सुनावणेंत माधव खट्टरचे वकील अॅड. अमेय प्रभुदेसाय हांणी बाजू मांडली. न्यायालया भार प्रसारमाध्य कडेन उलयतना तांणी व्हड खुलासो केलो. ऍड. प्रभुदेसाय हांणी म्हणलें, पुलिसांनी सुरवातेक असो दावो केल्लो, गौतम खट्टराक तें वादग्रस्त भाशण माधवान बरोवन दिल्लें म्हूण. मात, आतां तपासांत पुलिसांनी कबुली दितना सांगलें, तेंे भाशण गौतम खट्टरानूय बरयलें आनी ताचेर तो स्वताच व्यक्त जालो. हातूंत १८ वर्सां पिरायेच्या माधवाची कसलीच नाशिल्ल्याचें आतां स्पश्ट जालां.
माधवच्या अटकेच्या कायदेशीर प्रक्रियेयेचेरूय ऍड. प्रभुदेसाय हांणी प्रस्न केलो. ज्या गुन्यांवांत सात वर्सां परस उणे ख्यास्तीची तरतूद आसा अशा प्रकरणांत ’अर्णेश कुमार’ आनी आणि ’सत्येंद्र कुमार अंतिल’ अश्या सर्वोच्च न्यायालयाच्या निकालां प्रमाण अटके पयलीं नोटीस दिवप सक्तीचें आसा. मात ह्या प्रकरणांत कायद्याची प्रक्रिया मोडून एका १८ वर्सां पिरायेच्या तरणाट्याक सरळ अटक केली, जी गरजेची नाशिल्ली आनी टाळूं येताली, अशें तांणी स्पश्ट केलें. पुलिसांनीय आतां माधवाचे बंदखणीची गरज नाशिल्ल्याचें सांगिल्ल्यान, ह्या तांत्रीक मुद्यांच्या आधारार जामीन मेळोवपाची आस्त माधव खट्टरचया वकिलांनी उक्तायली. सध्या सगल्यांचें लक्ष न्यायालयाच्या निमाण्या निर्णया कडेन लागून आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
