भांगरभूंय | प्रतिनिधी
पणजी: गोंयच्या विंगड विंगड दर्यादेगांचेर बुडपी चार जाणांचे राज्य सरकार नियुक्त दृष्टी मरीन लायफसेव्हिंग संस्थेच्या लायफसेव्हसांनी जीव वाटायले. ह्या चार जाणां मदीं बेंगळुरूच्या दोन नेण्ट्यां भुरग्यांचोय आसपाव आशिल्लो. तशेंच, दृष्टी मरीनच्या पंगडान शेणिल्ल्या दोगां भुरग्यांक सोदून तांकां तांच्या पालकांकडेन भेट करून दिली, तशेंच शेणिल्लो मोबायल फोन सोदून तो धनयाक परत दिलो.
आश्वें: बेंगळुरूच्यान आयिल्ले १० आनी १२ वर्सां पिरायेचे चले दर्यांत पेयतना खोल उदकांत व्हांवून गेले. लायफसेव्हर्स विजय टाळकर आनी रुपेश हांणी रोखडेच रेस्क्यू बोर्ड आनी रेस्क्यू ट्युबाचे मजतीन तांकां वेळार भायर काडले आनी सुरक्षितपणान दर्यादेगेर हाडले. त्या दोगांय भुरग्यांची भलायकी बरी आशिल्ल्याची म्हायती दृष्टी मरीनान दिली.
बागा: बागा दर्यादेगेवेल्या प्रवेशदारा लागसार मेळिल्लो शेणिल्लो मोबायल फोन पुलिसांचे हाजेरींत वळख पटोवन तांच्या धनयांक परत केलो. तेच दर्यादेगेर घडिल्ले दुसरे घडणुकेंत कर्नाटकांतले दोग ३० आनी ३६ वर्सां पिरायेचे दादले खोल उदकांत व्हांवून गेले. लाइफसेव्हर्स जितेंद्र गिरी (रेस्क्यू ट्युबचे मजतीन) आनी श्रीकांत पारयेंकार (रेस्क्यू बोर्डचे मजतीन) हांणी तांकां बेगोबेग दर्यादेगेर हाडले.
बायणा: दर्यादेगेर पेंवपाची वेळ सोंपतना दृष्टी मरीनच्या लायफसेव्हर्सांक सुमार पांच वर्सां पिरायेचें चली एकटेंच मेळ्ळें. उपरांत बेगोबेग ताच्या पालकांक सोदपाची मोहीम राबयली. मात ताका येस आयलें ना. उपरांत ते चलयेक गोंय पुलिसांचे सुवादीन केलें. पुलिसांनी फुडलो तपास करून तिच्या पालकां मेरेन तिका सुरक्षीतपणान पावयली.
कोलवा: सांगेंचो पांच वर्सां पिरायेचो चलो दर्यादेगेर शेणलो. दृष्टी मरीनच्या सुपरवायझरान रोखडोच ताचो सोद घेवन ताका सुरक्षितपणान लायफगार्ड टॉवरार हाडलो. उपरांत सेगीत घोशणा करून निमाणें चल्याच्या कुटुंबियां कडेन ताका मेळयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
