भांगरभूंय | प्रतिनिधी
पणजी : ज्येश्ठ साहित्यकार, कायदो तज्ञ सुहास यशवंत दलाल (८८) संवसाराक अंतरले. तांच्या पार्थिवाचेर बुधवार २९ एप्रीलाक सकाळीं ११ वरांचेर कुसमण- केप्यां निमणे संस्कार जातले.
सुहास दलाल हे जनमत कौला सावन कोंकणीचे खांपे वावुरपी. त्या काळांत ‘परमळ’ ह्या नेमाळ्या वरवीं तांणी कोंकणीची सेवा केली. ते ताचे संपादक आनी प्रकाशक. जनमत कौलांतूय तांणी योगदान दिलां. लेखक, अनुवादक, कवी म्हूण तांणी वावर केला. तांणी कोंकणींत चवथीची पुजा, आरती, भक्तीगितां, नांदीय बरयल्या.
सुहास हे कोंकणीचे एक निश्ठावंत सेवक आनी कार्यकर्ते आशिल्ले, तांणी केल्लो वावर तरनाट्यांक सदांकाळ उर्बा दितलो अश्या उतरांनी कोंकणी भाशा मंडळान आनी अखिल भारतीय कोंकणी परिशदेन तांच्या मरणान दुख्ख उक्तायलां.
तांकां विमला वि. पै विश्व कोंकणी विशेश पुरस्कार, कोंकणी अकादमीचो शणै गोंयबाब कोंकणी भाशा सेवा पुरस्कार, कोंकणी भाशा मंडळाचो सेवा पुरस्कार मेळ्ळा. अखिल भारतीय कोंकणी परिशदेन मडगांव घडून आयिल्ल्या 33 व्या अधिवेशनांत तांच्या वावराची दखल घेवन तांचो भोवमान केल्लो.
तांच्या फाटल्यान तांची घरकान्न शांतल, पूत चैतन्य, सून क्रांती, नातरां, दोन लग्न जाल्ल्यो धुवो, जांवय असो परिवार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
