भांगरभूंय | प्रतिनिधी
पणजी : म्हापश्यां कृषी उत्पन्न बाजार मंडळान म्हापशें बाजारा फाटल्यान आशिल्ली खळी पुरयल्या. हाका लागून पावसांत बाजारांत उदक सांठून उरपाची शक्यताय आसा. बेकायदेशीरपणान खळी पुरोवप्याचेर कारवाय करची अशी मागणी टुगेदर फॉर म्हापशें हे संघटणेन केल्या. मंगळारा संघटणेच्या शिश्टमंडळान जिल्लोधिकारी अंकित यादव हांची भेट घेवन तांकां हे विशीं निवेदन दिलें. ह्या वेळार अॅड. महेश राणे, जितेश कामत, विजय भीके, राजेश मराठे हाजीर आशिल्ले.
ऍड. राणे हांणी सांगलें, पंदरा दिसां पयलीं बाजार मंडळान हे सैमीक खळयेंत कोयर उडयोवन ती पुरयली. कोयर एकठांय करपा खातीर कंत्राट काडला. मात कंत्राटदार कोयर एकठांय करिनाशिल्ल्याची म्हायती आमकां मेळ्ळ्या. एक तर ह्या कोयराक उजो लायता, ना जाल्यार तो खळयेंत उडयतात. हाचे व्हिडियो आमचे कडेन आसात. हे प्रक्रियेंत भ्रश्टाचार जाल्ल्याची शक्यताय आशिल्ल्यान जिल्लोधिकार्यांनी हाची चवकशी करवी अशी मागणी आमी केल्या.
तांणी म्हणलें, तशेंच बाजार वाठारांत सुरू आशिल्ल्यो हेर अवैध गजाली, हांगची घाण अश्या खुबश्या विशयांचेर म्हायतीय आमी जिल्लोधिकार्यांक दिल्या. सध्या पुरिल्ले खळयेंतलो कोयर बेगोबेग उसपपाची गरज आसा. जिल्लोधिकार्यांनी हे विशीं उपजिल्लोधिकारी, गोंय प्रदूशण नियंत्रण मंडळाच्या अधिकार्यांक सुचवणी दिवपाचें आस्वासना दिलां. सरकारान हे विशीं कृषी उत्पन्न बाजार मंडळ तशेंच कोयर कंत्राटदार हांचेर कारवाय करप गरजेचें. कोयराचो विलो लायना जाल्यार भलायकेच्योय समस्या निर्माण जावपाक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
