भांगरभूंय | प्रतिनिधी
भावा- भयणीच्या पवित्र नात्याचो आनी विस्वासाचो गैरफायदो घेवन एका हॉटेल वेवसायिकाक ₹ 5 लाख 70 हजारां परस चड रुपयांक नागोवपाचो एक धपको दिवपी प्रकार उक्ताडाक आयला. शेजाऱ्याक आपलो ‘राखी भाव’ मानून, तकलादु काणयो सांगून आनी भावनिक जाळें विणून एका कुटुंबाची कश्टाची जोड लुटपाचो गंभीर आरोप दुबावितेचेर जाला.
दिवचलच्या ‘ज्युडिशिअल मॅजिस्ट्रेट फर्स्ट क्लास’ (JMFC) न्यायालयान कोळवाळे पुलिसांक ह्या प्रकरणाची एफआयआर नोंद करपाचो आनी कायदेशीर तपास करपाचो आदेश दिला. पीडित सत्यवान विठ्ठल आमोणकार हांच्या चार वर्सांच्या दीर्घ कायदेशीर संघर्शा उपरांत हो निर्णय आयला. संबदित पुलीस यंत्रणेन दाद दिवंक नाशिल्ल्यान पीडितान न्यायालयाचें दार धाडायलें.
कागाळे प्रमाण, ही घडणूक 2020 च्या मध्याक सुरू जाली. हिदू, क्रिस्तांव धर्मांतलीं दोन नांवां धारण करपी दुबावीत शिरसय श्री. आमोणकार हांच्या शेजारच्या घरांत बिराडाक रावपाक आयली. कागाळी प्रमाण, तिणें आपल्या घरच्यांच्या त्रासांच्यो आनी घोवान केल्ल्या अन्यायाच्यो बनावट काण्यो सांगून आमोणकार कुटुंबाचो विस्वास संपादन केलो. हें नातें अदीक घट करपाक तिणें सत्यवान हांकां राखी बांदली आनी तांकां भाव मानलो. आपलो घोव आपलें सगळें भांगर घेवन गेलो आनी आपूण अर्थीक संकश्टांत आसा, अशें भासोवन तिणें तांची सहानुभूती मेळयली.
ह्या भावा- भयणीच्या नात्याचेर विस्वास दवरून आमोणकार कुटुंबान वेळोवेळ तिका पयशे दिले. आमोणकार कुटुंब एक ल्हान हॉटेल चलयतात आनी तांकां एक दिव्यांग धूव आसा. ते दुबावित बायलेची गरज भागोवपा खातीर तांणी घरचें भांगर – पोवळ्यो, गळसरी आनी मंगळसूत्र लेगीत सराफां कडेन आनी वित्त संस्थां कडेन तारण दवरलें. इतलेंच न्हय, तर खासगी सावकारां कडल्यान चड व्याजान रीण घेतलें. आपले दिव्यांग धुवेच्या बचत खात्यांतलेय ₹ 5000 लेगीत काडून तिका दिले.
जून 2021 मेरेन ही वट्ट रक्कम, व्याजा सयत सुमार ₹5, 72,000 जाली. हाका लागून कुटुंबाची अर्थीक परिस्थिती सामकी कोसळ्ळी. सुरवेक आमोणकार हांणी म्हापशें पुलिशेंत कागाळ केली, उपरांत पुलिसांनी ती कोळवाळे पुलीस ठाण्यांत वर्ग केली. पूण थंयच्या पुलिसांनी ती नोंद करपाक टाळाटाळ केल्या कारणान, निमाणें हताश जावन आमोणकार हांणी ‘कलम 156 (3) CrPC’ खाला न्यायालयांत अर्ज केलो.
अॅड. विनायक डी. पोरोब हांणी पिडेस्ताचे वतीन न्यायालयान बाजू मांडली. 16 एप्रिल 2026 दिसा दिल्ल्या आदेशांत, सन्माननीय न्यायाधिशांनी निरीक्षण केलें की कागाळ पळयल्यार दखलपात्र गुन्यांव घडिल्ल्याचें स्पश्ट जाता. कायद्या प्रमाण अशा वेळार एफआयआर नोंद करप अनिवार्य आसा. त्यानुसार, तपास अधिकाऱ्याक सगले पुरावे एकठांय करून 30 दिसां भितर न्यायालयाक अहवाल सादर करपाचो आदेश दिला. आतां ह्या प्रकरणाचो रीतसर तपास सुरू जातलो.
अॅड. विनायक डी. पोरोब
9923146840
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
