भांगरभूंय | प्रतिनिधी
पणजीः पोरणें गोंयचो हातकातरो खांब्याचें खरें नांव Pelourinho Novo म्हणल्यार नवो खांबो. ३०- ४० वर्सां पयलीं बरयिल्ल्या एका पुस्तकांच्या आदाराचेर ताचो ‘हातकातरो खांबो’ असो उल्लेख जाता. मात ह्या खांब्याचेर लोकांचे हात कापल्यात हाका इतिहासीक पुरावो ना. गौतम खट्टरान एका व्हिडीयोंत हाचो उल्लेख केले उपरांत गोंय सरकारान ‘हातकातरो खांबो’ हो संरक्षीत स्मारक म्हूण जाहीर केला, अशें हळदोणेंचे आमदार कार्लुस फेरेरा हांणी म्हणलां.
सांत फ्रान्सिस झेवियराचेर आक्षेपार्ह टिका करपी गौतम खट्टर हाणें हातकातरो खांब्याचो विशय घेत सांत फ्रान्सिस झेवियराचो उल्लेख एका व्हिडीयोंत एक वर्सां पयलीं केल्लो. ह्या व्हिडीयो आड फेरेरा हांणी नव्यान खट्टरा आड कागाळ दाखल केल्या. कागाळ दाखल केले उपरांत ते उलयताले.
२९ आॅक्टोबर २०२५ क खट्टरान पयलीं सांत फ्रान्सीस झेवियराचेक व्हिडीयो काडून ताका आतंकवादी म्हणत, आमी आयुश्यांत लेगीत आयकूंक नाशिल्ल्या वायट गजालींचो वापर केला. देखून एक वेगळी घडणूक म्हूण ताचीं सगळीं उतरां बरोवन एक कागाळ दाखल केल्या, अशें फेरेरा हांणी सांगलें.
ह्या व्हिडीयोंत ताणें पोरणें गोंयच्या हातकातरो खांब्यांचो उल्लेख केला. खर्यांनीच ताचें नांव Pelourinho Novo म्हळ्यार नवो खांबों, जो एक गावाचो वा शाराचें केंद्र. ह्या केंद्राचेर घोशणा जाताली वा गांवची सुरवात जाताली. त्या खांब्याचेर लोकांचे हात कातरताले अशें सांगून कांय लोकांनी एक पॅटर्न तयार केला, असो आरोप फेरेरा हांणी केलो.
गोंयांत सांत फ्रान्सीस झेवियर लोकांचे हात कातरताले ही म्हायती चुकीची आनी दुस्वासान भरिल्ली म्हायती लोकांच्या मनांत रुजोवपाची ही रणनीती आसा. हातूंत सरकाराचो लेगीत हात आसा. हो व्हिडीयो आयले उपरांत भरपूर लोकांनी लायक कमेंट मारून लोकांच्या मनांत एक भावना तयार जाली. मागीर गोंय सरकारान मार्च २०२६ त Pelourinho Novo हो हातकांतरो खांबो ह्या नांवान संरक्षीत स्मारक म्हण जाहीर केलो, असो दावोय फेरेरा हांणी केलो.
लोकांनी म्हाका हो व्हिडीयो धाडले उपरांत हांवें पयलीं ताची पडटाळणी करून कागाळ दाखल केली. पुण फक्त पडटाळणीच करिनासतना पुलिसांक व्हिडीयोचो लिंक लेगीत दिला आनी तो डावनलोड करून एका ड्रायव्हांत सेव्ह केला. हें प्रकरण गाजले उपरांत हो व्हिडीयो खट्टर डिलीट करतलो ना जाल्यार पुलीस सायट ब्लॉक करपाचो आदेश दितले. देखून पुरावो मेळचो ना आनी सगळे लिपून वतले, असो दुबाव फेरेरा हांणी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
